Na-missing nga 6-anyos patay na

CEBU, Philippines — Patay na nga nakit-an ang usa ka 6-anyos batang lalake human kini na-missing og kapin usa ka semana.

Una niini, ang 6 anyos nga bata nawala niadtong Enero 9 sa Purok Kabulakan, Barangay Libjo, Lungsod sa Tabogon.

Ang pamilya sa bata ingon man ang kapulisan ug opisyales sa Barangay nagtinabangay aron makit-an ang 6-anyos nga bata. Apan nilabay nalang ang usa ka semana wala pa gyud kini makita.

Apan kagahapon sa buntag ang Tabogon Police Station nakadawat og impormasyon nga dunay nakit-ang patay'ng lawas sa Purok Kawayan, Barangay Libjo sa maong Lungsod.

Ang patay'ng lawas positibong giila sa amahan nga si Prince Caballes nga iyaha kining anak.

Nakit-an ang bata sa sapa nga naghayang ibabaw sa dakong bato ug nagsul-ob og puwa nga shorts ug dalag nga t-shirt.

Nadiskobrehan ang patay'ng lawas sa bata alas 11:30 kagahapon sa buntag sa usa ka Elmer Lequin, 61 anyos, residente sa Purok Kawayan, Barangay Libjo nga nangita og kawayan.

Sa pagkutlo ning maong balita padayon ang imbestigasyon sa Tabogon Police Station aron mahibaw-an kun unsay nahitabo sa bata ug nganong namatay kini.  IBM BANAT NEWS