CEBU, Philippines — Gipahigayon kagahapon pasado alas 8:00 sa buntag ang dry run sa fluvial procession diha sa Mactan Channel. Ang Philippine Coast Guard, Philippine Navy ug Maritime Police nisalmot sa maong kalihokan pagsiguro nga mapatuman ang kahapsay sa prosisyon diha sa kadagatan.
Ang Galleon nga ginganlan og Santo Niño de Cebu nga maoy sakyan sa imahen ni Santo Niño karong Enero 18, 2025 ang apil usab sa fluvial dry run.
Ang fluvial dry run nanukad kini diha sa pantalan sa Naval Forces Central sa Dakbayan sa Lapu-lapu nisubay sa Mactan Channel ngadto na sa unahan gamay sa CCLEX ug dayon tuyok balik ug nidunggo diha sa Pier 1, Dakbayan sa Sugbo. Matud ni Cebu Coast Guard Station Commander Jerome Lozada nga malamposon ang ilang gipahigayon nga dry run ug tungod kay bag-o man ang maong barko hinungdan aduna sila’y mga giusab ginagmay sa gikusgon sa dagan niini.
Si Lozada nagkanayon nga mas nauna sila sa gi-target nga duha ka oras diin ilahang nahuman ang kalihokan sulod sa usa ka oras ug kwarentay singko minutos.
Gipahibalo nga adunay color coding ang registered fluvial participants aron mahan-ay ang dagan sa mga sakyanang pangdagat ug gani nanawagan siya sa mga mosalmot nga mosayo aron dili magproblema.
Base sa talaan sa PCG-7 adunay 329 ka sakayang pangdagat ang gipaabot nga moapil sa fluvial procession ug nipahimangno ilabi na ngadto sa mga dili rehistrado nga dili gmohimo ug mga dili maayong buhat aron dili sila mag-atubang unya ug silot.
Sa laing bahin, malampuson ang gipasiugdahang simulations exercise sa kapolisan sa Lapu-Lapu City Police Office (LCPO) n iadtong Martes.
Kabahin kini sa pagpangandam sa LCPO sa pagdala sa imahen ni Señor Santo Niño sa Siyudad sa Lapu-Lapu sa Biyernes sa gabii, Enero 17, 2025. Si Police Lieutenant Colonel Christian Torres, tigpamaba sa LCPO nipadayag nga sa maong simulation exercise ilang gipahigayon ang mahitabo nga pagpamomba sama sa mga nasinating panghitabo didto sa Mindanao. (BANAT NEWS)