CEBU, Philippines — Patay na nga napalgan sa canal ang usa ka TV technician diha sa Purok Kawayan, Barangay Manlagtang, Lungsod sa Tabogon niadtong Martes sa buntag.
Ang biktima mao si Danilo Dela Rama Amistoso, 56-anyos, biyudo, nagpuyo sa Purok Cabindan, Barangay Somosa sa maong lungsod.
Base imbestigasyon sa Tabogon Police Station nga pasado alas 7:00 sa buntag niadtong Martes si Mike Arnoco Retubado, 28-anyos ang nagpahibawo nga adunay nakit-an nga patay’ng lawas.
Ang kapolisan daling niresponde sa maong taho diin napalgan nila ang biktima nga nagbuy-od sa kanal.
Si Michelle Peroso Amistoso, anak sa biktima nibutyag sa mga polisan nga ang iyang amahan nibiya sa ilang panimalay alas10:00 sa buntag niadtong Lunes, Enero 13, 2025 aron mangita og customer nga adunay guba nga TV gumikan kang TV technician man kini. Dugang ni Amistoso nga ang iyang amahan taud-taod na nga naghambin og sakit. (BANAT NEWS)