Problema sa baha sa mambaling gihatagan na og sulbad

CEBU, Philippines — Gihatagan na og solusyon sa kagamhanan sa Dakbayan sa Sugbo ang problema sa baha sa sitio Alaska, Barangay Mambaling sa matag higayon nga mobunok ang kusog nga uwan.

Sa report sa Cebu City Public Information Office gipalawman na ang sapa ug gisugdan na ang pagkuha sa mga basura nga nakabara sa sapa sa sitio Nava aron dili na magpundo ang tubig uwan ug modagayday ngadto sa kabalayan.

Gawas niana, moabot ngadto sa 26 ka pamilya nga nagpuyo sa sapa ang nakadawat sa tabang pinansyal gikan sa kagamhanan.

Matag usa ka pamilya nakadawat og tag P20,000 aron makasugod og tukod og balay apan dili na diha sa sapa tungod kay delikado sab gyud ang maong dapit.

Gawas sa tabang pinansyal, nakadawat sab sila og housing material ug food packs.

Matud pa sa kapitan sa Barangay Mambaling nga si Seller Salvador nga nagkasinabot na sila sa mga namuyo sa maong dapit nga kinahanglan na nila nga boluntaryo nga gub-on ang ilang mga balay o mga barong-barong inig human og dawat sa tabang pinansyal.

Tumong sa maong pagpaguba sa mga balay aron nga modagayday na sab ang tubig baha.

Mapasalamaton sab ang kapitan ngadto sa maong mga lumulupyo tungod kay nisanong kini sa barangay aron nga mapahiluna sila og tarong sa laing dapit. (BANAT NEWS)