Contingent sa Talisay mopakita og hugot nga debosyon ni Santo Niño

CEBU, Philippines — Grabe nga debosyon ang makita sa katawhan sa presentasyon gikan sa Talisay City contingent karong adlaw nga Domingo sa Sinulog Grand Showdown.

Kini maoy gibutyag ni Mikki Aznar, city tourism officer kinsa maoy nangulo sa contingent nga gilangkuban sa mga tinun-an sa highschool ug college.

Matud pa ni Aznar nga gikan pa sa buwan sa Nobiyembre ang ilang pagbansay sa ilang presentasyon.

Ang Talisay nisalmot gihapon sa Sinulog-Based Category diin nagtuyok ang estorya sa kabag-ohan gumikan sa grabeng pagtuo ug pangaliya ni Sr. Santo Niño.

Nagkanayon si Aznar nga wala nila igsapayan ang buntag, udto, hapon, gabii ug kadlawon nga pagbansay tungod kay ang kabataan nga contingent pulos kini debotos sa balaang bata ug ilang gihalad ang kakapoy sa iyang kapistahan.

Dul-an sa 500 ka mga dancers ug propsmen ang mosalmot sa Sinulog Grand Parade.

Dugang pa ni Aznar nga siya usa ka transgender nga deboto ug iyang napamatud-an ang kaayo ni Sr. Santo Niño nga walay pili kung unsa man ang estado sa kinabuhi. (BANAT NEWS)