25-anyos nga lalake sikop nga nagdala og armas

CEBU, Philippines — Balhog sa prisuhan ang usa ka 25-anyos nga lalake human kini gialarmahan nga armado diha sa sitio Samayo, Barangay Lorega San Miguel, siyudad sa Sugbo kagahapon sa kadlawon, Miyerkules, Enero 15, 2025.

Ang nadakpan mao si Reymond Noquillo Gimongala, nagpuyo sa Sitio Plastikan, Barangay Duljo Fatima ning siyudad.

Nakadawat og tawag ang Parian Police Station 1 Cebu City Police Office gikan sa concerned citizen mahitungod sa armadong tawo sa lugar.

Girespondehan dayon kini nga miresulta sa pagkasikop sa suspek nga nasakmitan og calibre .45 nga armas nga dunay usa ka buhing bala.

Suma ni Police Major Marvin Fegarido, Hepe sa Parian Police Station 1 nga i-verify pa nila kun dunay record kaniadto ang suspect sanglit dili man kini taga Barangay Lorega San Miguel.

Kasong kalapasan sa Republic Act 10591 ug COMELEC Gun ban ang ipasaka batok sa suspek. (BANAT NEWS)