SFI niawhag likayan ang pagpalit og Sinulog tickets sa mga fixers

CEBU, Philippines — Giawhag sa kadagkuan sa Sinulog Foundation Incorporated ang mga manan-aw ug sinulog sa grandstand nga kung mamalit og ticket adto gayud sa lehitimo ug dili sa mga fixers.

Gibutyag ni SFI Executive Director Elmer "Jojo" Labella nga dunay mga tickets nga mapalit lang kini pinaagi sa online.

Matud pa ni Labella, sa gusto mopalit sa ticket mahimo sila nga moadto sa https://sinulogfestival.com diin ang general admission Green, tag P1,500 ug General Admission Yellow tag P1,000.

Sumala pa ni Labella, mas maayo adto lang gayud mopalit og ticket sa gihatag nga Sinulog site tungod kay dili gihapon makasulod sa venue kun peke ang mapalit nga ticket.

Gitug-an ni Labella, aduna gayuy state of the art nga gamit nga maoy moila kun legit ug peke ang mga ticket nga napalit.

Dugang pa ni Labella, nga dili pa sila makasulti kun aduna pa bay ticket o wala na tungod kay ang naghupot niini mao ang marketing department.

Si Labella, nipadayag nga atol sa pagpahibalo ni Mayor Raymond Alvin Garcia niadtong nilabay nga adlaw sa discount price sa sinulog ticket daghan usab ang nakapalit niini. (BANAT NEWS)