Headline inflation sa Central Visayas Misaka

CEBU, Philippines — Nisaka ngadto sa 2.9 porsyento ang headline inflation sa Central Visayas sa Disyembre 2024, nga 0.6 porsyento nga mas taas sa 2.3 porsyento niadtong Nobiyembre 2024, sumala sa datos sa Philippines Statistics Authority (PSA) Central Visayas.

Ang nag-una'ng hinungdan sa pagsaka mao ang tinuig nga pagsaka sa transportasyon sa 5.6 porsyento sa Disyembre gikan sa tinuig nga pagkunhod sa 2.1 porsyento sa Nobiyembre.

Ikaduha mao ang paspas nga annual increment sa index sa housing, water, electricity, gas and other fuels nga anaa sa 3.9 porsyento gikan sa 1.1 porsyento sa miaging buwan.

Nakatampo usab ang information and communication nga nakatala og paspas nga tinuig nga pagsaka nga 0.6 porsyento sa Disyembre gikan sa 0.5 porsyento sa miaging tuig.

Bisan paman niining pagsaka, ang Disyembre 2024 inflation rate nagpabiling mas ubos kung itandi sa 3.9 porsyento nga natala kaniadtong Disyembre 2023.

Sa laing bahin, ang mosunod nga mga commodity group nakatala og mas ubos nga inflation rate mao ang food and non-alcoholic beverages sa 2.3 porsyento gikan sa 4.0 porsyento; alcoholic beverages and tobacco sa 2.1 porsyento gikan sa 3.2 porsyento; Furnishings household equipment and maintenance sa 4.4 porsyento gikan sa 4.6 porsyento; Health sa 2.2 porsyento gikan sa 2.5 porsyento; ug Personal care and miscellaneous goods and services sa 2.1 porsyento gikan sa 2.4 porsyento.

Tungod niini, ang regional average inflation gikan Enero 2024 hangtud Disyembre 2024 anaa sa 3.2 porsyento, nga mas ubos og 1.9 porsyento kumpara sa annual average inflation rate niadtong 2023 nga 5.1 porsyento. (BANAT NEWS)