Call center agent, lima nasakpan sud sa drug den
CEBU, Philippines — Unom ang nadakpan ug duha ka drug dens ang napuhag dihang nagpahigayon og buy-bust operation ang Philippine Drug Enforcement Agency (PDEA)-7 ug Philippine National Police niadtong Lunes, Enero 13, 2025.
Alas 8:15 sa gabii niadtong Lunes ang drug enforcement officers sa PDEA-7 Regional Special Enforcement Team ug Cebu City Police Office Station 10 nagpahigayon og buy-bust operation sa Sitio Mayupay, Barangay Quiot, Siyudad sa Sugbo nga miresuta sa pagguba sa drug den ug tulo ka tawo ang nadakpan.
Nasikop sa maong operasyon ang subject sa buy-bust operation ug drug den maintainer nga si alyas Richard, 38, nagpuyo sa naasoy nga dapit.
Laing nadakpan ang duha ka tigbisitahan sa drug den nga sila si alyas Reymond, 34 anyos, call center agent ug nagpuyo sa Barangay Basak San Nicolas ug si alyas Gian, 22 anyos, construction worker taga Lungsod sa Pinamungajan.
Nasakmit sa mga operatiba ang unom ka putos sa gituohang shabu nga nitimbang og 15 gramos ug gibana-banang mobalor og P102,000, buy-bust money ug nagkalain-laing drug paraphernalia.
Samtang sa samang adlaw, laing operasyon ang gihimo sa mga operatiba sa PDEA-7 RSET ug CCPO Station 2 sa Sitio Santa Teresa, Barangay Cogon Ramos ning siyudad diin usa ka drug den ang giguba ug laing tulo ka indibidwal ang nadakpan.
Nadakpan ang subject sa buy-bust operation ug drug den maintainer nga alyas Glen, 35, taga Cogon, Pardo ug laing duha ka tigbisitahan sa drug den nga sila si alya Mike, 47; ug residente sa Cogon, Pardo ug si alyas Brix, 32, taga Barangay Pajo, dakbayan sa Lapu-Lapu.
Nakompiskar sa otoridad ang unom ka putos sa gituohang shabu nga nitimbang og 11 gramos nga nibalor og P74,000, buy-bust money ug mga drug paraphernalia.
Samtang usa ka menor de edad ang nadakpan sa kapulisan sa Abellana Police Station 2 Cebu City Police Office(CCPO) atol sa ilang buy-bust operation sa Osmeña Boulevard, Barangay Sambag 1, siyudad sa Sugbo niadtong miaging adlaw.
Ang nadakpan nagpuyo sa La Paloma, Sitio Tambisan, Barangay Tisa ning siyudad. Sa impormasyon sa Abellana Police Station 2 nga ang maong menor de edad gikustodiya nila human kini nakuhaan og illegal nga drugas nga niabt og 1.0 grams ug mobalor og P6,800. IBM BANAT NEWS
- Latest
