CEBU, Philippines — Gibalhog sa prisuhan ang usa ka anak nga lalake nga giingong misuway sa pagpatay sa iyahang inahan kay nasuko kini nga wala hatagi og kwarta pangpalit og pagkaon diha sa Sitio Upper Saryo, Barangay Bulacao, dakbayan sa Sugbo niadtong Lunes sa hapon, Enero 13, 2025.
Ang gidakop mao ang 43-anyos, samtang ang biktima mao iyahang inahan nga 67- anyos nga biyuda.
Nasayran nga ang inahan nangayo og tabang sa mga barangay tanod kay giingong nag-wild ang anak niini kay nasuko nga wala hatagi og kwarta. Giingong gihatdan og pagkaon ang dinakpan apan wala niya gidawat kay gusto niini og kwarta.
Nasayran nga ang suspetsado tiggamitan og illegal nga drugas maong dili mohatag og kwata ang inahan niini kay basin og ipalit lang kini og drugas.
Tungod niini, nasuko ang suspek ug gihanaan og dunggab ang inahan apan nakadagan ang naulahi ug nakapangayo og tabang.
Nakuha gikan sa suspek ang kutsilyo nga iyang gipanghulga sa inahan. Ang suspetsado nga nahinabi sa dySS Super Radyo Cebu miangkon sa nahimong krimen ug siya miangkon nga Domingo sa gabii nakagamit siya og illegal nga drugas ug sa iyang pagmata pagka Lunes gigutom siya maong nangayo og kwarta sa iyahang inahan.
Giapas niya iyahang inahan nga nagduwa og tong-its sa balay sa silingan ug gipangayoan og kwarta aron ipalit og pagkaon apan wala siya hatagi niini maong naglagot siya ug nipauli nalang apan giingong gisundan siya sa inahan ug gikasab-an siya niini hinungdan sa ilang panaglalis ug diha na siya nikuha og kutsilyo.
Apan iyang gihimakak nga buot niyang patyon ang inahan, matud niya gipunit niya ang kutsilyo tungod lang sa kasuko. Kasong attempted parricide ang atubangon sa suspetsado. IBM BANAT NEWS