CEBU, Philippines — Girekomendar sa Sinulog Foundation Inc. nga i-ban ang mga props men nga nalambigit sa lamok-lamok niadtong Domingo sa gabii human sa Sinulog sa Kabataan sa Dakbayan 2025 diin ni-viral sa social media ang nakuha nga video sa maong hitabo.
Makita sa video ang nagkarambola ug nagbinatoay ang mga props men gikan sa duha ka barangay sa siyudad.
Nasayran sa mga opisyal sa Sinulog Foundation Inc.nga nagsugod kini sa kantiyaway sa mga props men nga nisangpot sa kagubot. Ang maong insidente nakapaalarma sa SFI hinungdan nga mirekomendar sila nga i-ban ang mga props men sa umaabot nga Sinulog Grand Parade aron masiguro nga malikayan nga magkatagbo pag-usab ang nagkabikil nga grupo.
Matud ni Elmer “Jojo” Labella, executive director sa SFI nga ilahang ipatawag ang mga organizer ug choreographer aron tukion ug mahan-ay ang mga lakang aron sa pagsiguro nga walay susamang panghitabo nga motumaw unya sa Sinulog Grand Parade.
Girekomendar nga hulipan ang mga nalambigit sa lamok-lamok nga mga props men aron sa pagsiguro nga inig abot sa Sinulog Grand Parade. Gibutyag ni Labella nga on-track usab sila karon sa ilang pagpangandam sa nagsingabot nga Sinulog Grand Parade ug padayon ang ilang matag karon ug unya nga tigom sa matag cluster nga lumilihok sa dakong kalihokan. Si Labella niawhag sa tanang mananayaw ug sa mga tumatan-aw nga ilakip usab sa ilang pag-ampo ang kahapsay ug kalinaw sa Sinulog Grand Parade tungod kay dili lang kini pagpakita sa sayaw apan debosyon usab ngadto kang Santo Niño. BDB BANAT NEWS