CEBU, Philippines — Andam na ang Cebu City Department of Public Services alang sa pagmentinar sa kalimpiyo sa rota lakip na sa sulod ug gawas sa Cebu City Sports Center diin anha ipahigayon ang Sinulog Grand Parade 2025.
Gibutyag sa pangulo sa DPS Paul Gelasque nga bisan pa og tonelada nga basura ang nakolekta nila niadtong Domingo, Enero 12, 2025 human sa gipahigayon ang Sinulog sa Kabataan sa Dakbayan apan dako ang iyang pasalig nga andam ang iyang mga tawo alang sa kahapsay ug kalimpiyo sa siyudad. “Sa atong cleanliness, okay na kaayo. Ato na nga na-meeting ang atong mga tawo, naa na sila’y mga kaugalingon nga mga assignments to clean the streets”, matud ni Gelasque.
Gibutyag ni Gelasque nga 800 ka mga tawo ang ipakatap nga maoy molimpiyo sa rota lakip sa sulod ug gawas sa CCSC.
Gawas sa DPS, motabang usab og pagpanglimpiyo ang Cebu City Environmental Sanitation Enforcement Team (CESET) ug ang Cebu City Environment and Natural Resources Office (CCENRO).
Gitahasan ni Cebu City Mayor Raymond Alvin Garcia si Konsehal Joel Garganera aron sa pagbutang og mga basurahan sa rota sa Sinulog Grand Parade lakip sa sulod sa CCSC.
Subay niini, matud ni Gelasque nga imontar nila ang 30 ka portalets sa rota sa Sinulog Grand Parade ug sugdan nila kini og butang sa dili pa ang Enero 19, 2025.
Gipaniguro ni Gelasque nga limpiyo ang portalets aron magamit kini sa mga bisita.
Gawas sa mga portalets, nakalatid usab sa Executive Order No.1 ni Mayor Raymond Alvin Garcia nga kinahanglang bukas usab alang sa publiko ang mga pansayan sa mga establisamento nga duol rota sa parada.
Nunot niini, gikompirma sa tigpamaba sa Metropolitan Cebu Water District Minerva Gerodias nga adunay ibutang nga 10 ka potable water stations sa rota sa grand parade. Gani, adunay lima ka mga potable water station sa rota sa solemn procession ug adunay ibutang usab diha sa Devotee City sa Plaza Independencia.
“Paper cups will be provided but we encourage the public to bring their own water jug or containers that they can refill at the drinking stations”, matud ni Gerodias. BDB BANAT NEWS