CEBU, Philippines — Pipila ka adlaw sa dili pa ang Sinulog Grand Parade, ang mga opisyal sa dakbayan sa Sugbo ug sa Probinsya sa Sugbo subsob na ang pagpangandam pagsiguro nga ang maong dakong kalihokan magmalampuson, ilabina nga karon ibalik kini sa karaang venue, sa Cebu City Sports Center (CCSC).
Si Gobernador Gwendolyn Garcia ug Cebu City Mayor Raymond Alvin Garcia maoy nangulo sa coordination meeting uban sa tanang stakeholders sa Sinulog 2025 niadtong Enero 13, diin nahisgotan ang seguridad, ug sistema nga ipatuman aron plastado ug walay gubot sa umaabot nga dakong kalihokan.
Atol sa tigom, gisugyot ni Garcia nga inay pito (7) ka stations kon asa mag peform ang mga contingents sa ilang ritual showdown, himoon na lang kini nga tulo aron nga dili na maghuot ug mag-abot ang mga contingents ug paspas ang dagan sa street dancing, padulong sa CCSC, hilabina nga sobra 40 ka mga contingents ang moapil sa grand parade karong tuiga.
Si Garcia nagkanayon nga sa tulo ka stations, butangan og tag duha ka mga judges, samtang ang usa ka judge maoy roving. “If you will have seven stations mohunong ni 7 times but if you will combine two judges sitting together, anyway lain-lain man na sila’g tinan-away, then you will have three stations, mas mubo, and then you can spread,” matud ni Garcia.
Sa 5.6 kilometro nga rota sa carousel sa Sinulog Grand Parade, si Garcia mipasiguro sa kapolisan nga hugot ang seguridad ilabina nga ilang gipaabot nga moabot sa tres milyones ang mosaksi sa kalihokan.
Matud ni Garcia, gawas sa pagdeploy og mga personnel, kinahanglan adunay CCTV cameras, drones ug motorcycle riding PNP.
Ang Police Regional Office-7 misaad hinoon nga han-ay na ang ilang security plan, mopadala kini og sobra 7, 000 ka mga uniformed personnel ug force multipliers. Aduna pud 32 ka units sa 360-degree CCTV cameras ang ibutang.
Ang PDEA mopadala usab og K9 units ug dugangan kini sa Coast Guard.
Samtang ang Visayan Electric mipasalig nga adunay kurente sa CCSC, adunay dugang power supply aron matubag ang demand sa kuryente nianang adlawa.
Ang Metropolitan Cebu Water District (MCWD), magbutang usab og water stations sa nagkadaiyang dapit sa carousel ug mohatag og tubig mainom sa mga skwelehan kon asa ang billeting quarters sa mga contingents.
Ang mga telecommunications company usab misad nga maayo ang komunikasyon nianang adlawa. MEL BANAT NEWS