Mga bata dili pakuyogon sa fluvial procession

CEBU, Philippines — Ang 12-anyos paubos nga mga bata dili tugotang mosakay sa mga sakayang adunay katig nga mosalmot sa fluvial procession karong Enero 18, 2025.  

Kini ang gibutyag ni Captain Jerome Lozada, commander sa Cebu Coast Guard Station.

Matud ni Lozada nga gikinahanglan nga mosubay sa safety protocols nga nakabutang sa ilang giisyu nga pagtugot ilabi na sa pagsunod sa capacity sa sakyanan diin dili tugotan ang overloading.

 Ang moapil sa fluvial procession kinahanglang adunay husto nga live-saving equipment sama sa life jacket ug life-rope ug uban pa.

Ug ang pasakyon sa mga sakayang pangdagat kadto lang nakabutang base sa dokumento nga gihuptan nila kong pila ang gitugot ug sigurohon usab ang ilang mga life-jacket.

Gipadayag ni Lozada nga gawas sa mga bata 12-anyos nga paubos nga dili pasakyon gidili usab ang mga pabuto, ballon ug ang pag-inom-inom og ubang mga butang nga makahatag og peligro sa maong kalihokan.

Gibutyag ni Lozada nga anaa sila karon sa final stage sa ilang pagpangandam sa umaabot nga fluvial procession.

Nasayran nga mas daghan ang nakaparehistro karong tuiga itandi sa nakalabay’ng katuigan diin sobra sa 320 ka sea vessels ang narehistro karon.

Gikataho nga ang mga sakayan bahigon kini diin mag-una ang mga dagko nga barko nga iplastar samtang ang mga gagmay adto ipahimutang sa uwahi alang sa pagsiguro sa kaluwasan sa mga moapil sa prosisyon.

Gipahibalo usab ni Lozada nga siradohan ang Mactan Channel sa mga moagi nga sakyanang pangdagat sa alas 4:00 sa kadlawon ug gikatakda nga sugdan ang fluvial procession sa alas 6:00 sa buntag padulong sa unahan sa CCLEX.

Gilaoman nga molanat og duha ka oras ang fluvial procession ug target nga makadunggo kini diha sa Pier 1 sa alas 8:00 sa buntag. BDB BANAT NEWS