CEBU, Philippines — Ang Barangay Santo Niño, Dakbayan sa Sugbo diin nahimutang ang daghang mga balay patigayon nipaneguro nga mabantayan ang mga lihok sa mga tawo pinaagi sa mga kuha sa closed circuit television (CCTV) camera diha sa mga strategic nga dapit nga sakop sa barangay. Kini ang gibutyag ni Barangay Captain Lourdes “Lulu” Ramirez nga nahinabi sa DyRF1215/Banat News.
Matud ni Ramirez nga tungod kay ang iyang barangay anaa nahimutang ang business district ug duha ka mga dagko nga simbahan diin nalakip niini ang Basilica Minore Del Santo Niño de Cebu ug Cebu City Hall hinungdan nga aduna sila’y mga gipakatap nga mga CCTV camera sa ilang area of responsibility.
Gibutyag ni Ramirez nga 56 ka CCTV camera ang naglibot sa iyang AOR ug klaro usab kaayo ang mga kuha niini hinungdan nga dali ra nga masakpan kong adunay mga naghimo og binoang dioha sa ilang dapit.
Ug adunay nagbantay sa ilang CCTV sulod sa 24 oras diin dali ra nila nga ma-trace kong adunay mangreklamo.
Giawhag ni Ramirez ang mga deboto ug mga dumuduong sa Dakbayan sa Sugbo nga dili ipasaya-saya ilang mga kabtangan ug dili motubay sa mga tawo nga dili nila kaila nga kunohay makig-estorya aron dili mabiktima sa mga badlongon. BDB BANAT NEWS