Barangay tanod sa Brgy Lawaan nakuhaan og armas

CEBU, Philippines — Nadakpan ang usa ka barangay tanod sa Barangay Lawaan 3, Dakbayan sa Talisay human kini nakuhaan og armas didto sa Lower Crusher, Barangay Lawaan 3 niadtong Domingo sa gabii.

Ang nasikop mao si Johnalo Cuizon Cabrera, 39 anyos, minyo nga nagpuyo sa maong lugar.

Si Police Lt. Col. Epream Paguyod, hepe sa kapolisan nibutyag nga nagpahigayon og agresibo nga pagpatrolya ang iyang mga sakop sa dapit ug naabtan ang suspek nga adunay gidala nga armas hinungdan sa iyang pagkasikop.

Nakuha gikan kaniya ang usa ka .38 nga revolver nga adunay tulo ka buhing bala.

Giangkon ni kapitan Frederick Marababol nga aktibo nga tanod sa ilang barangay si Cabrera.

Matud pa niya nga daan na nga badlungon si Cabrera sa ilang dapit apan sa miaging mga buwan niapil kini sa mga tigom alang sa pagbag-o sa kinabuhi hangtud nga nisulod sa pagka tanod. Apan namatikdan nga nagkadugay ni abusar kini pagbalik hangtud nga naatlan na gyud nga nakuhaan og armas.

Si Paguyod niingon nga sa ilang nakuha nga impormasyon nalambigit usab sa ilegal nga drugas ang dinakpan. Apan way nakuha nga drugas sa iyang posisyon dihang siya nadakpan.

Gibalhug na sa bilangguan ang dinakpan ug mag atubang kini og kaso nga paghupot og ilegal nga armas ingon man kalapasan sa comelec gunban.  MEL BANAT NEWS