MCPO, LCPO nangandam nasab sa traslacion

CEBU, Philippines — Mopatuman og hugot nga seguridad ang kapolisan sa Mandaue City Police Office (MCPO) ug Lapu-Lapu City Police Office ( LCPO) sa pagbisita sa Imahen ni Senior Sto. Niño karong Biyernes Enero 17, 2025.

Ang imahen ni Senior Sto. Niño dad-on sa Siyudad sa Mandaue sa buntag sa maong adlaw pinaagi sa traslacion.

Ang mga opisyal sa Siyudad sa Mandaue nga pangulohan ni Mayor Glenn Bercede uban sa kaparian sa National Shrine of Saint Joseph maoy mosugat niini nga mag-atang sayo sa buntag sa atubangan sa Innodata sa Barangay Subangdaku alang sa pagdawat niini gikan sa mga opisyales sab sa Cebu City.

Dad-o kini kauban ang imahen sa Birhen sa Guadalupe ang Patrona sa Siyudad sa Sugbo ngadto na sa National of Saint Joseph alang sa paghiusa sa Sagrada Pamilya, Senyor San Jose, Birhen Maria ug Senior Sto. Niño.

Si Police Lieutenant Colonel Mercy Villaro, tigpamaba sa MCPO miingon nga samtang magpabilin ang Sagrada Pamilya sa sulod sa dakbayan pahugtan sab nila ang pagbantay alang sa seguridad sa mga deboto.

Pagka-alas 10 sa gabii, sirad-an sa trapiko ang Mandaue-Mactan Bridge alang sa traslacion diin motabong ang imahen sa Balaang Bata padung sa Lapu-Lapu City alas-12 sa tungang gabii.

Dad-on kini sa National Shrine sa Birhen sa Regla sa Barangay Poblacion sa Siyudad sa Lapu-Lapu.

Si Police Lieutenant Christian Torres, tigpamaba sa LCPO miingon aduna nay giandam nga mga polis aron mobantay sa agianan ug sa simbahan.

Sayo sa kaadlawon sa adlaw nga Sabado Enero 18 ang imahen ni Senior Sto. Niño dad-on kini sa headquarters sa Naval Forces Central sa Barangay Looc diin kini isakay og barko alang sa Fluvial Procession nga salmutan og kapin 300 ka sakyanan sa dagat pabalik sa Cebu City. (BANAT NEWS)