Kanhi criminology student nakuhaag P7.4M shabu 

CEBU, Philippines — Nagtingkagol sa prisuhan ang usa ka 20-anyos nga lalakeng kanhi tinun-an sa kursong criminology human kini nadakpan sa buy-bust operation sa Regional Police Drug Enforcement Unit(RPDEU)-7 ug Philippine Drug Enforcement Agency(PDEA)-7 sa Sitio San Vicente, C. Padilla Street, Barangay Duljo Fatima, siyudad sa Sugbo.

Ang dinakpan mao si Kyle Tortoga Camahalan alyas Cali, high value individual sa kapolisan nga nagpuyo sa Sitio Puntod, Barangay Mambaling ning siyudad.

Nasakmitan matud pa ang suspetsado og 1,100 grams nga shabu nga nagkantidad og P7.4 million.

Sa impormasyon sa kapulisan, gipaubos nila og duha ka semana nga monitoring ang suspek tungod sa nadawat nilang og impormasyon nga nalambigit kini sa pagpamaligya og illegal nga drugas.

Matod pa ang suspetsado maka dispose og usa ka kilo nga shabu kada semana sa Cebu City, Mandaue City ug Lapu-Lapu City.

Giingong ang tinubdan sa suspetsado sa illegal nga drugas kay naa sa sulod sa prisuhan.  Kasong kalapasan sa Republic Act 9165 ang ipasaka batok sa suspetsado. (BANAT NEWS)