Nagbinatohay human sa Sinulog

CEBU, Philippines — Paimbestigahan ni Mayor Raymond Alvin Garcia ang nahitabo nga lamok-lamok sa duha ka mga grupo sa mga propsmen sa duha ka mga contingents nga parehong gikan pa nagtigi sa Sinulog sa Kabataan sa Dakbayan sa Sugbo, Domingo sa gabii nga nikatap karon sa social media.

Atol sa gipahigayon nga press conference Lunes sa buntag, gimanduan ni Garcia si Konsehal Joel Garganera sa pagpahigayon og imbestigasyon bahin niini ug ipatawag ang mga nalambigit sa maong kagubot.

Madungog sa nikatap nga video nga adunay nisyagit nga usa ka babaye nga nagsige og badlong sa grupo sa mga lalaking nagsakay sa trak sa barangay nga dunay kargang mga props.

Taud-taod adunay nangambak nga mga sakay sa tr5ak ug diha na nag-iyahay og binatohay ug nagginukdanay sa tunga sa kalsada. Ang insidente gikatahong nahitabo diha sa Sambag 1 ning Dakbayan sa Sugbo.

Ang babaye sa video nialegar nga mga sakop ang duha ka grupo sa barangay Tisa ug Labangon.

Suway nga gikuhaan og pamahayag sa DyRF1215/Banat News ang SK Chairman ug Sinulog Head sa Barangay Tisa Riziel Saladaga,  apan nihimakak siya bahin niini, matud niya wala sila malambigit sa maong insidente kay igo ra sila niagi sa maong dapit.

Dugang pa ni Saladaga, usa sa ilang mga sakop ang nabukol kay naigo sa bato apan wala gyud silay labot sa kagubot. Didto na nila kini natabangan pag-abot nila sa barangay kay wala sila nihunong. Matud niya nataymingan lang atol sa away naagi ang ilang trak sa barangay Tisa.

Gipadayag ni Saladaga, iyaha usab gi verify ang driver ug barangay staff nga nagsakay sa trak ug sila pulos nangangkon nga naagi ra sila sa maong lugar.

Gitug-an ni Saladaga, maayo na man hinoon ang kadtong naigo nila sa bato atol sa pag-agi sa maong dapit human nakaangkon kini ug bukol.

Samtang si Kapitan Derik Yap, sa Barangay Labangon wala na mohatag ug dugang mga pamahayag kay sa pagkakaron padayon pa ang gihimo na nila nga imbestigasyon may kalabutan niini.

Gipadayag sa kapitan dili siya gusto nga pangunahan ang gihimo nga imbestigasyon tungod kay gusto man usab niya masayran ang tanan.

Gitug-an ni Yap, karon hinoon Huwebes sa dili pa ang Sinulog Grand Parade mopatawag siya og tigum sa tanan niyang mga sakop sa ilang contingent nga moapil.

Suway nga gikuhaan sa Banat News og pamahayag ang kapitan sa Barangay Inayawan Kirk Repollo, human giingong gikan sa ilang barangay ang nalambigit sa maong lamok-lamok apan wala pa kini mohatag og pamahayag.  Ang mayor mihulagway nga isolated incident lang knii ug gipaneguro nga dili na kini masubli, apan bisan sa nahitabo gihulagway niyang malampuson gihapon ang Sinulog sa Kabataan sa Dakbayan ug malaumon siya nga mao usab kini ang mahitabo sa Sinulog Grand Parade.

Si Garganera sa iyang bahin nitug-an nga makigtagbo siya sa mga kapitan nga giingong nalambigit ang mga sakop sa lamok-lamok aron dili na kini masubli pa atol sa dako nga selebrasyon.

Ang Cebu City Police Office(CCPO) mohimo sab og imbestigasyon ug gipangita ang mga naa sa video nga naglinabayay og bato.

Matud pa nahitabo kini sa Sitio Purras, J. Alcantara Street, Barangay Sambag 1, siyudad sa Sugbo niadtong Domingo sa gabie, Enero 12, 2025 human sa kalihukan.

Ang Abellana Police Station 2 Cebu City Police Office (CCPO) gipahibawo bahin sa hitao apan sa ilang pagabot sa lugar wala na didto ang mga nalambigit sa kagubot.

Sa imbestigasyon sa kapulisan base sa gibutyag sa mga BPSO Personnel nga sila si Michael Roma ug Huge Hugo nga na report kini sa ilaha alas 8:50 sa gabii.

Ang away giingong gasugod samtang naa pa sulod sa Cebu City Sports Center ug nisamot kini dihang nakagawas na sila sa dapit.

Matod ni Police Lieutenant Colonel Maria Theresa Macatangay, Deputy City Director for Operations ug tigpamaba sa Cebu City Police Office (CCPO) gasugod matod pa ang bangi sa duha ka grupo gumikan sa sungog.

Kun pananglitan nga mopasaka og kaso ang mga agrabyado mo-assist ang kapulisan ngadto nila. (BANAT NEWS)