CEBU, Philippines — Bag-o na ang City Director sa Cebu City Police Office human si Police Colonel Antonietto Cañete girelibuhan sa pwesto ug gipulihan ni Police Colonel Enrico Figueroa isip Officer-in-Charge.
Epektibo niadtong Enero 11, 2025 ang paglingkod ni Colonel Figueroa isip OIC City Director sa CCPO human nigawas ang order niya samtang si Colonel Cañete balik sa Police Regional Office (PRO)-7 headquarters.
Kagahapon sa buntag ang gipahigayon ang turnover ceremony didto sa conference hall sa PRO-7.
Si Figueroa miyembro sa Philippine National Police Academy Class of 1999 ug gikan kini sa Police Regional Office(PRO)-3 sa wala pa nabalhin sa PRO-7.
Hinoon, bisan paman paghulip sa bag-ong City Director dili kini makaapektar sa security preparations nila sa Sinulog 2025 nga mahitabo pila ka adlaw gikan karon.
Matud ni Police Lieutenant Colonel Maria Theresa Macatangay, tDeputy City Director for Operations ug tigpamaba sa CCPO nakahan-ay nang daan ang ilahang pagpangandam sa Sinulog.
Apan giangkon ni Mayor Raymond Alvin Garcia nga nakurat siya sa kalit nga paghulip kang Cañete kay gihulagway niyang dili gyud maayo ang timing tungod kay anaa pa gyud tunga-tunga ang dakbayan sa pagsaulog sa Sinulog 2025.
“I was very surprised about this change. Among mga preparation for the Sinulog activities for the peace and order and safety, si Col. Cañete was on top of everything… and he was doing a good job. Unya in the middle of everything, dili kaayo maayo nga ilisan,” padayag pa ni Garcia atol sa press conference niya kagahapon.
Bisan pa man sa maong kabag-uhan, mapasalamaton si Garcia kang Cañete nga nilingkod isip hepe sa CCPO sukad pa niadtong Hulyo 2024.
“I’d like to commend and congratulate Col. Cañete for a job well done. He is the first police director under my mayorship pero observing from the past, I think Col. Cañete is one of the best city directors that Cebu City ever had,” pulong pa ni Garcia.
Gipasalig ni Garcia nga makatrabaho niya ang bisan kinsa pa ang mga mahimong hepe sa CCPO kung makapasar sa iyang mga kwalipikasyon.
Matud pa ni Garcia nga ang unang tahas sa bag-ong hepe sa syudad mao ang pagtan-aw, pagtuon ug pagpatuman sa tanang plano nga gihan-ay nila ni Garcia ug Cañete alang sa Sinulog. (BANAT NEWS)