15-anyos gilugos sud sa kasilyas

CEBU, Philippines — Gibalhog sa prisohan ang usa ka 21-anyos nga lalake human siya gireklamo nga nanglugos og menor de edad diha sa Barangay Sambag 2, Siyudad sa Sugbo niadtong Sabado sa gabii, Enero 11, 2025.

Ang suspect nga 21-anyos nga lalake ug biktima nga 15-anyos nga babaye pulos nagpuyo sa naasoy nga barangay.

Sa impormasyon sa Abellana Police Station 2 Cebu City Police Office, ang suspek gidala sa mga BPSO personnel sa Barangay Sambag 2 diha sa ilang buhatan human ang biktima nga gikuyogan sa iyang 43-anyos nga amahan nipasangil sa suspek nga gilugos siya niini.

Matod pa pagka alas 3 sa hapon niadtong Sabado, Enero 11, ang suspek ni-chat sa biktima nga paadtuon sa ilang panimalay kay naay ihatag.

Niadto sab ang biktima ug samtang naa kini sa balay sa suspek, giingnan sa suspek ang biktima nga pasudlon sa CR ug dihang nisulod ang biktima gi-lock dayon sa suspek ang pultahan samtang naa silang duha sa sulod gibuhat sa suspek ang krimen.

Human sa krimen, nidangop ang biktima sa Barangay Hall hinungdan nga gidakop sa mga tanod ang suspek. (BANAT NEWS)