Probinsiya sa Sugbo mokolekta na sa kita gikan sa CAMPCOR

CEBU, Philippines — Makasugod na og kolekta ang Probinsya sa Sugbo og halin o bayad gikan sa kita sa Camotes Island Power Generation Corporation (CAMPCOR), ang nagsuplay og kurente sa isla sa Camotes.

Kini human nga usa ka kasabotan ang gipirmahan ni gobernador Gwendolyn Garcia ug Engr. Jose Rommel Orillaza, presidente sa CAMPCOR alang sa pag-abli ug pagbaton og trust accounts kon asa ideposito ang gahin sa Kapitolyo gikan sa koleksyon sa bayad sa kuryente.

Ubos sa maong kasabotan, ang CAMPCOR gitahasan nga mo-remit sa gahin sa Probinsya gikan sa kita niini matag kwarter.

“The establishment of trust accounts ensures that these funds are managed transparently, with Province of Cebu responsible for maintaining them in accordance with the guidelines set by the DOE” sumala sa Capitol Information Office.

Base sa section 29 (a) sa Internal Rules and Regulations (IRR) sa Akta Republika 9136 o ang Electric Power and Industry Reform Act of 2001, ang generation facility sama sa CAMPCOR, kinahanglan nga mogahin og usa ka sentimo matag kilowatt-hour (P0.0025 / kWH) gikan sa kinatibuk-ang halin sa kuryente alang sa development and livelihood fund (DLF) ug sa reforestation, watershed management, health and or environment enhancement fund (RWMHEEF) ngadto sa host community.

Sa maong balaod, ang Probinsya sa Sugbo kinahanglan adunay 30% nga bahin sa DLF ug sa RWMHEEF.

Ang CAMCOR maoy nagsuplay og 8.41 megawatts nga kuryente sa isla sa Camotes pinaagi sa planta niini nga diesel ug generating unit ubos sa kasabotan niini sa Camotes Electric Cooperative, Inc. (CECI) sulod sa 15 ka tuig. (BANAT NEWS)