CEBU, Philippines — Gikasagmuyo ni Gobernador Gwendolyn Garcia nga wala mapuno ang mga bakante nga slots sa mga beneficiaries sa micro-enterprise assistance program sa Probinsya sa Sugbo.
Nasayran sa gobernador nga gikan sa 500 ka slots sa Sugbo Negosyo program alang sa season 3 niini, anaa pa sa 259 ang nakuha nga slot ug bakante pa ang 241.
Atol sa tigom sa gobernador uban sa mga stakeholders sa Sugbo Negosyo, lakip niini ang mga focal persons sa matag buhatan, mga miyembro sa Sangguniang Panlalawigan, uban nila bokal Glenn Anthony Soco, Mandaue Chamber of Commerce and Industry (MCCI) president Mark Ynoc, ug mga kanhi president sa MCCI nga sila si Steven Yu and Kelie Ko, si Garcia nagkanayon nga kinahanglan mapuno ang maong mga slots aron daghan sa mga Sugboanon ang matabangan sa maong programa.
“Wala ko makontento sa gidaghanon sa mga qualified beneficiaries sa Sugbo Negosyo,” matud ni Garcia atol sa ilang tigom niadtong Enero 9.
Ang matag buhatan sa mga board members maoy mo-screen ug mopili sa mga beneficiaries.
Ang matag benepesaryo mahatagan og P200, 000 nga alokasyon matag usa ubos sa maong programa. Ang maong kantidad isulod sa QR-code cards nga ihatag sa Kapitolyo nga maoy gamiton sa mga benepesaryo sa pagpalit og mga gamit sa ilang negosyo ug aron mapanindot niini ang ilang mga tindahan.
Ang mga materyales mapalit ngadto sa mga partner nga tindahan sa Probinsya.
Ang 259 unang makadawat sa unang hugna sa tabang pinansyal nga P20, 000 sa Enero 13 pinaagi sa maong mga QR-coded cards.
Aron makadawat sa nahabiling P30,000 alang sa ikaduhang hugna, ug P150, 000 sa ikatulong hugna sa tabang pinansyal, kinahanglan makapasasr ang mga benepesaryo sa evaluation sa Sugbo Negosyo team.
Ang Probinsya migahin og P100 million alang sa maong programa nga bahinon sa 500 ka mga beneficiaries.
Si Garcia niawhag sa mga gagmay nga negosyante nga pahimuslan ang maong programa sanglit dako ang tabang niini sa mga Sugboanon nga naglisod pagpangita og panginabuhian.“ This is the chance that they are looking for,” suma pa ni Garcia. (BANAT NEWS)