Gun ban gipatuman na sugod kagahapon

CEBU, Philippines — Opisyal na nga nagsugod kagahapon, Domingo, Enero 12, 2025 ang gun ban nga senyales sab nga nagsugod na ang election period alang sa midterm elections karong bulan sa Mayo ning tuiga.

Pinaagi sa kolaborasyon sa Commission on Election (COMELEC) ang PRO-7 kauban ang Visayas Command miapil sa nationwide simultaneous launching aa COMELEC checkpoints sa may Sergio Osmeña, siyudad sa Sugbo.

Ang bag-ong direktor sa PRO-7,  Police Brigadier General Redrico Maranan mihatag og gibug-aton sa importansiya sa pagsunod sa guidelines sa COMELEC sa pagpahigayon og checkpoints aron masiguro ang public safety sa election period.

Kadtong authorized personnel gikan sa Philippine National, Armed Forces of the Philippines ug ubang law enforcement agencies nga gitugutan lamang maoy makadala og armas panahon sa gun ban. 

Nagpasabot kini nga dili si bisan kinsang polis o sundalo ug ubang law enforcement personnel ang makadala-dala og armas kun wala silay exemption gikan sa Comelec o kun dili nila oras ting-duty.

“Our goal is to achieve zero gun-related incidents during the midterm elections. We are ready for safe, secure, and orderly 2025 National and Local Elections," sigon ni Maranan.

Giawhag sa opisyal ang publiko nga mokooperar sa simultaneous checkpoint nga gipahigayon sa kapulisan ug COMELEC.

Ang maong inisyatiba importante sa pagpatuman sa gun ban ug ingon sa paghatag og luwas nga environment sa tanan.

Sa Lapu-Lapu  City Police Office (LCPO), si Police Colonel Dyan Agustin nangunay sa pag-supervise  sa pagahimoon nga checkpoint  sa matag presinto  sa kapolisan  sa LCPO.

Naglakip  sa susihon sa  Comelec  checkpoint nga pagahimoon angm mga nagsakay og motorsiklo, awto sa pagsiguro nga dili makasulod ang mga dautang elemento alang sa pagmugnag kagubot  sa umaabot midterm election  Mayo  12, 2025.— Romeo Marantal, Romeo T. Limpangog (BANAT NEWS)