CEBU, Philippines — Patay ang usa ka kanhi hepe sa barangay tanod sa Barangay Carreta, Cebu City human kini gipusil atubangan sa ilang balay sa Sitio Caimito sa maong barangay kagahapon sa buntag, Domingo, Enero 12, 2025.
Siya mao ang unang biktima sa pagpamusil sa Cebu City atol sa pagsugod sa Comelec gun ban kagahapon nga ang tumong unta mao ang pagmenus sa mga krimeng may kalabotan ang paggamit og armas ilabi na sa nagsingabot nga piniliay sa Mayo.
Ang biktima mao si Johnny Alburo Lagaras, 64, residente sa naasoy nga dapit samtang ang mamumuno wala pa mailhing lalaki nga nagsul-ob og brown military jacket, blue pants ug puti nga sapatos.
Sa inisyal nga imbestigasyon sa Waterfront Police Station 3 Cebu City Police Office ang biktima nanglimpyo sa jalousie sa ilang bintanan sa atubangan sa ilang panimalay nianang tungora.
Giduol kini sa maong lalaki ug diretsong gipusil gamit ang gituohang kalibre .45 nga armas diha sa wala nga dunggan hinungdan sa pagkasarasay niini sa ubos.
Ang mamumuno daling misibat agi sa gamay nga eskina nga posibleng padulong mogawas sa General Maxilom Avenue.
Niresponde ang Cebu City Disaster Risk Reduction and Management Office ug sa ilang pag-abot nagbuy-od na ang biktima ug wala nay kinabuhi.
Na-recover sa kapulisan sa crime scene ang basiyo sa bala sa kalibre .45 nga armas.
Personal grudge ang gisubay sa kapulisan nga motibo sa krimen tungod kay ang biktima maoy kanhi hepe sa mga tanod sa Carreta ug giingong aktibo kaayo kini sa prevention sa peace and order ug anti-criminality ug posibleng dunay nasuko.
Padayon ang hot pursuit operation sa kapulisan batok sa suspetsado. (BANAT NEWS)