CEBU, Philippines — Ang dakbayan sa Naga maoy napili sa Provincial School Board nga mohost karong tuiga nga Cebu Provincial Meet.
Ang maong sports event ipahigayon karong Pebrero 2 hangtud 7 diin ang maong kalihokan sa mga tinun-ang atleta sa Department of Education (DepEd) magtigi sa nagkadaiyang paugnat sa kusog.
Atol sa tigom si gobernador Gwendolyn Garcia kinsa maoy pangulo sa Provincial School Board uban sa mga DepEd assistant regional director Atty. Fiel Almendra, Cebu Province Schools Division Superintendent Dr. Senen Paulin, ug mga City Schools Division Superintendents niadtong Enero 10, nasabotan nga ang Naga maoy mo-host sa maong kalihokan, diin 24 ka mga sports categories ug cultural activities ang ipahigayon.
Apil niini ang mga tinun-ang atleta sa elementary hangtod highshool sa 44 ka mga lungsod sa Probinsya sa Sugbo.
Ang makadaog sa maong paugnat sa kusog maoy morepresentar sa Probinsya sa Sugbo ngadto sa Central Visayas Regional Athletic Association (CVIRAA).
Gusto usab ni Garcia nga iapil ang city school division sa delegasyon sa Probinsya subay sa iyang tinguha nga mahiusa ang city ug provincial divisions ubos sa One Cebu Province nga inisyatiba.
Ang city division moapil karong tuiga sa sports meet isip pagsugod sa hingpit na nila nga pag-apil sa sunod tuig nga provincial meet.
Si Garcia nipasabot nga importante nga maapil ang city division sa mga programa sa probinsya isip kabahin sa ka unique nga paagi sa “education governance”. (CEBU NEWS)