Mga senior makapalit na og tambal nga walay purchase booklet

CEBU, Philippines — Gihangop sa mga senior citizen sa siyudad sa Lapu-Lapu ang pagwagtang na sa purchase booklet isip rekisito sa pag-angkon og discount sa pagpalit og tambal sa mga botika.

Si Sofronio Baring, 72 anyos nga taga Barangay Canjulao nipadayag nga usa sa mga hinungdan nga dili siya makapangayog diskuwento sa paliton niyang tambal kon makalimtan niya pagdala ang purchase booklet nga pangitaon gayod sa teller aron ilang ilista ang tambal nga gipalit base usab sa resita nga gihatag sa doctor.

Sa nasayran sa siyudad sa Lapu-Lapu gihimo sa mga sakop sa konseho ang lakang pagwagtang sa purchase booklet pinaagi sa ipatuman nga resolusyon human kini naaprobahan sa konseho.

Si Konsehal Emilio Galaroza Jr. maoy nangamahan sa resolusyon alang sa pag-adopt sa Department of Health administrative order nga nagmando sa City Social Welfare and Development Office uban sa City Health Office alang sa paglusad sa paghatag og kasayuran ngadto sa katawhan.

Sa laing bahin gipadayon ni Mandaue City mayor Glenn Bercede ang paghatod og libreng serbiyo ngadto sa kabarangayan sa siyudad sa Mandaue.

Unang nakapahimulos sa libreng serbisyo karong tuiga mao ang barangay Cambaro nga ilang gibisita kauban ang pipila ka sakop sa konseho ug ilang gihatod ngadto sa mga molopyo ang nagkadaiyang            serbisyo.

Lakip na niini ang serbisyo sa City Legal Office, Business Permit and Licensing Office, Local Civil Registrar’s Office, Public Employment Services Office, Persons with Disabilities Affairs Office ug daghan pa.

Ang City Agriculture’ Office nanghatag usab og seedlings sa tanom.

Adunay libreng tupi ug massage ang gitanyag sa MCCTEST.

Nihatag usab og demo sa paghimo og sabon o dishwashing liquid ang City Cooperative’s Office.

Gihimo usab sa Mandaue City Vet ang paglaygit ug pagkapon sa mga binuhing iring ug iro.  (BANAT NEWS)