Pasahero natagak sa dagat, patay na

CEBU, Philippines — Pasahero sa barko nga giingong natagak sa dagat nakuha na sa mga sakop sa Coast Guard Station Camotes diha sa kadagatan sa Consuelo, Lungsod sa San Francisco, Isla sa Camotes, Huwebes sa buntag, Enero 9, 2025.

Ang biktima mao si Teofilo Gonzales, 37, taga Hindang, Leyte.  Nagkanayon si Lieutenant Jenna Diosa May Pagcaliwagan, Station Commander sa Coast Guard Station Camotes nga nahinabi sa dySS Super Radyo Cebu pasado alas 3 sa kaadlawon niadtong Huwebes nakadawat sila og report gikan sa kapitan sa barko nga dunay pasaherong natagak 3.9 nautical miles gikan sa baybayon sa Lungsod sa San Francisco. Ang maong barko gikan sa Ouano Wharf ug paingon kini sa Ormoc, Leyte.

Alas 8:40 sa buntag dunay nitawag sa ilang buhatan nga dunay usa ka mananagat nga nakakita og patay'ng lawas nga naglutaw- sa kadagatan sa Consuelo, San Francisco.

Nailhan nila ang patay'ng lawas pinaagi sa ID sa biktima.  Magpadayon sab ang imbestigasyon sa Coast Guard sa maong hitabo.  IBM BANAT NEWS