CEBU, Philippines — Magpabilin nga abli ang Cebu South Bus Terminal (CSBT) diha sa dalan Natalio Bacals, Dakbayan sa Sugbo sa Enero 19, 2025 o atol sa Sinulog Grand Parade.
Matud ni Gobernador Gwendolyn Garcia nga magpabilin ang operasyon sa gidumala nga terminal sa Kapitolyo aron nga dali ra makauli ang mga taga probinsiya nga mosaksi sa Sinulog.
Si Garcia nagkanayon nga dili pwede mag-overload ang mga bus gawas sa terminal aron walay risgo sa disgrasya.
Si Garcia niluwat sa maong pamahayag human nga ang Cebu City Transportation Office (CCTO) niawhag sa mga bus operator ug drayber nga kinahanglang mosunod kini sa ilatid nga protocol ug traffic management hilabina sa pagpakanaog ug pagpasakay sa pasahero gawas sa terminal aron malikayan nga maghuot.
Si Garcia nipahimangno sa bus operators nga kinahanglang istrikto ang pagpatuman sa “no seat reservation policy” aron tanang pasahero mag-angay.
Si Pastor Alcover, pangulo sa Public Mass Transport sa CCTO nagkanayon nga ilang nauyonan ang usa ka sestema aron masiguro nga han-ay ug hapsay ang dagan sa trapiko. “Apprehending violators could take long and worsen the traffic situation. Instead, enforcers will take pictures of violators, which will be submitted to the LTO and LTFRB for a show-cause order”, matud ni Alcover.
Sa laing bahin, adunay kabutangan sa mga magpabadlong atol sa Sinulog Festival tungod kay gaandam na ang Cebu City Police Office (CCPO) og mga Bust-Bus diin anha itanggong ang madakpan nga mga badlongon.
Matud ni Police Lieutenant Colonel Maria Theresa Macatangay, deputy city director for operations ug tigpamaba sa Cebu City Police Office nga ang Bust-Bus ipakatap diha sa nagkadaiyang dapit sa Cebu City aron dali nila nga ma-transport ang mga badlongon ug adto kini temporary ibalhog.
Ang Bust-Bus i-supervise sa mga police investigator diin moagi sila og saktong proseso ug magkinaunsa mahimo pang mapasakaan og kaso.
Adunay hotline number ang Cebu City Police Office nga mahimong tawagan sa mga dunay concern o emergencies.
Ang hotline number mao ang 0954 983 1867 mao kini ang Isumbong Mo Kay CD. Decemay P. Padilla/BDB BANAT NEWS