CEBU, Philippines — Gikatahong 30 ka container vans ang imontar alang sa Devotee City diin sugdan karong Martes Enero 14, 2025 ang pagmontar niini.
Ang Devotee City magsilbi kini nga puy-anan sa mga deboto ni Señor Santo Niño nga naggikan sa mga lagyo nga dapit nga nangita og libreng kapuy-an atol sa kasaulogan sa Fiesta Señor. Nasayran nga nagsugod na usab ang pagpangreshistro sa gusto nga mopahimulos sa maong libre nga puy-anan diin mahimutang kini sa Plaza Independencia atubangan sa Cebu Central Post Office sa dalan A. Pigafetta.
Gikompirma usab ni Konsehal Pancrasio “Francis” Esparis kinsa maoy nangulo sa pagpangandam sa Devotee City nga buksan kini karong Enero 17 ug adunay pre-registration sa alas 6:00 sa gabii. Gikinahanglan nga mapakita og tiket sa bus o mga shipping line ticket nga magsilbi nga pruweba sa ilang pagbiyahe gikan sa gawas sa siyudad.
Ang Cokaliong Shipping Lines ang magsilbing sponsor karong tuiga ug abagan kini sa Department of Social Welfare and Services sa pag –optimize sa manpower aron mahatagan og komprehensibo nga suporta sa mga deboto.
Sa laing bahin, sulod sa 24 oras ang mga tanod sa Barangay Santo Niño nga mag-duty subay sa kapistahan ni Señor Santo Niño. Kini ang gibutyag ni Kapitan Lourdes Ramirez sa Barangay Santo Niño.
Matud ni Ramirez nga sukad nga gisugdan ang misa novena 24 oras na usab ang ilang mga tanod sa pag-duty diin ubos sa ilang area of responsibility ang Basilica Minore del Santo Niño.
Lakip usab ang ilang mga volunteer sa pag-apil sa pagbantay sulod sa 24 oras alang sa peace and order sa ilang palibot sa barangay.
Gipahibalo usab ni Ramirez nga padayon ang ilang pagpabilin sa mga deboto nga nagdala og dakong luggage ug mga bag diha sa ilang barangay hall aron makasulod sila sa simbahan. Rowena D. Capistrano/BDB BANAT NEWS