Kulturanhong kalihokan sa Sinulog 2025 gibuksan kagahapon

CEBU, Philippines — Human sa pagbukas sa relihiyosong kalihokan sa Fiesta Senior  niadtong Huwebes, kagahapon sa hapon gibuksan na usab ang kulturanhong kalihokan, ang Sinulog 2025 kinsa gihulagway nga bonggang opening salvo.  Ang official kick off sa Sinulog 2025 gihimo kagahapon diin unang gihimo ang declaration ceremony human sa misa nga gihimo diha sa Basilica Minore del Santo Niño de Cebu.

Gisunod ang parada sa tanang stakeholder sa Sinulog Festival 2025 nga gilangkuban sa mga ahensiya sa kagamhanan.

Nasaksihan usab ang dancing performance sa mga contingents gikan sa 18 ka tunghaan sa Dakbayan sa Sugbo.  Ang parada nisubay diha sa Osmeña Boulevard paingon ngadto sa Cebu City Sports Center alang sa pagbukas sa kulturanhong kalihokan sa Sinulog karong tuiga matud ni Elmer "Jojo" Labella, executive director sa SFI.

Subay niini, gipahibalo ni Labella nga karong adlaw’ng Domingo, Enero 12, 2025 ipahigayon na usab ang Sinulog sa Kabataan sa Dakbayan nga salmotan usab sa mga contingent gikan sa nagkadaiyang barangay sa Siyudad sa Sugbo.

Matud ni Labella nga unang higayon kini nga sugdan sa Barangay Mabolo nga mosubay sa dalan Imus hangtud sa P. Del Rosario liko sa Osmeña Boulevard paingon ngadto sa CCSC.

Giklaro usab ni Labella nga sa Sinulog sa Kabataan sa Dakbayan modungan ang Brass Band Competition diin sila ang mag-una niini.

Sa laing bahin, nagsaulog sa kapistahan sa ilang patron Jesus Nazareno niadtong Huwebes ang Barangay Dumlog, Dakbayan sa Talisay.

Diha sa susdlonong lugar sa Jose Rizal Street sa Barangay Dumlog nahimutang ang simbahan sa Jesus Nazareno.  Kini ang bag-ong dapit sa Archdiocesan Shrine of Jesus Nazareno nga kanhi nahimutang sa Barangay Cansojong sa maong siyudad.  Nidagsa ang mga tawo diha sa lugar diin uban kanila ang naggikan sa laing dapit.

Si Archbishop Jose Palma ang nipahigayon sa misa pontipika uban sa rector sa Simbahan Reverend Father Narciso Amoro ug ubang mga kaparian.  BDB BANAT NEWS