CEBU, Philippines — Gihatagan og compensation o bayad sa Probinsya sa Sugbo ang dili momenus 19 ka mga tag-iya og luna sa lungsod sa Daanbantayan.
Ang mga tag-iya og luna miuyon sa pagbaligya sa ilang propedad ngadto sa Probinsya sa Sugbo alang sa katukoran sa 150-megawatt solar power plant didto sa maong lungsod.
Si gobernadora Gwendolyn Garcia maoy nangunay sa paghatag og cheke ngadto sa inisyal nga 19 ka mga tag-iya sa luna niadtong Enero 8. Ang bayad anaa sa P300, 000 ngadto sa P10 million, depende sa gidak-on sa luna nga gipanag-iya.
Si Garcia nagpasalamat sa maong mga indibidwal nga wala kini maghatag og labad sa Probinsya sa Sugbo.” Tungod ana, mouli mo nga magdala og kamatuoran sab sa pagkamatinud-anon sa Probinsya sa Sugbo” matud ni Garcia.
Sumala sa Capitol Information Office nga anaa na sa 28 ka mga tag-iya og luna ang nakadawat og bayad gikan sa Kapitolyo, kon diin ang siyam unang nakadawat og bayad sa wala pa ang tigom niadtong Enero 8.
Ang presyo sa luna gi-set kini sa appraisal committee sa hunta probinsyal gipangulohan ni bokal Mela Franco.
Ang Kapitolyo nakig-alayon sa usa ka Acciona Energia global usa ka kompaniya sa renewable energy nga gikan sa Espanya nga nagplano pagtukod og solar power plant sa mga napalit nga luna sa Barangay Talisay sa lungsod sa Daanbantayan.
Nipirma na og kasabutan ang Probinsya sa Sugbo ug ang Acciona alang sa maong proyekto nga maoy labing una nga klase sa solar power plant lukop nasud. MEL BANAT NEWS