CEBU, Philippines — Gipirmahan na ni Mayor Raymond Alvin Garcia ang iyang labing unang Executive Order alang karong tuiga nga nagdili sa mga street parties ug liquor ban ug ang mga angayan nga i-regulate atol sa kasaulugan sa Sinulog 2025 aron pagsiguro sa kalinaw, kahapsay, ug luwas nga pagsaulog sa dakong selebrasyon.
Ubos sa maong kamanduan , sugod Enero 18 ug 19, 2025 walay street parties nga gitugotan aron hapsay ang mga dalan aron dali makatubag sa alarma kung adunay mga emerhensya.
Matud pa ni Garcia nga mamahimong makapahigayon og party apan sulod lang sa establisamento.
Gipahibalo usab ni Garcia sa EO niini nga ipatuman usab niini ang Liquor ban sa solemn foot procession route gikan sa alas-6 sa buntag ngadto sa alas-8 sa gabii sa Enero 18, 2025.
Bawal mag-inom sulod sa 300 meter radius sa Sinulog Grand Parade Route gikan sa alas-12:01 sa kadlawon ngadto sa alas-10 sa gabii sa Enero 19, 2025.
Gawas sa liquor ban, ginadili sab ang kusog nga mga concerts, mga pagpahigayon og kalihukan ug uban pa nga makabalda sa rota sa prosesyon gawas lang kung aduna kini mga gihuptan nga special permit.
Ang maong kamanduan sa mayor nagmando usab kini sa mga balay patigayon labi na kadtong mga adunay kalihukan nga mohatag og security plans lakip usab ilang medical triage ug tugotan sa pagpagamit ang ilang mga pansayan sa ilang mga kostumer ug sa mga dili kustomer.
Gimanduan usab ang mga balay patigayon sa pag-operate sa ilang mga CCTV cameras, kinahanglan nilang hawanan o limpyohan ang ilang palibot sa pagsugod ug sa paghuman sa kalihukan sa Sinulog.
Kadtong masakpang nakalapas sa EO mameligro ang ilang business permits.
Sa pikas bahin, motabang ang Cebu City Police Office sa Business Permit ang Licensing Office(BPLO) sa pagpatuman sa EO No. 1 sa mayor ilabi na kining liquor ban ug gun ban.
Gihulagway sa kapulisan nga makatabang kini sa pag-regulate sa distribusyon sa mga ilimnong makahubog ug mamenus ang kabuluyagon sa mga tawo ilabi na gyud sa Sinulog Grand Parade.
“The EO is not something to curtail their intent to party, that particular act lang is being regulated on certain and specific areas in the City, anyway ang ubang areas in the City dili man sad na prohibited if they heard the pronouncement of the Mayor dili man ang tibuok Siyudad sa Sugbo ang gi-prevent ani nga lihok, along sa parade route and processional route and I think it is very reasoable and I think nasayod gyud ang kadaghanan nganong kailangan nato ni buhaton”, pagpasabot ni Police Lieutenant Colonel Maria Theresa Macatangay, Deputy City Director for Operations ug tigpamaba sa CCPO. Gumikan kay ipatuman sab ang gun ban mohimo og subsob nga checkpoint ang Cebu City Police Office kay tinguha gyud nila nga mamenusan ang mga insidente nga naglambigit og mga armas.— Preciosa L. Bacalso, Decemay Padilla (BANAT NEWS)