LTO mopahigayon og agresibong kampaniya paggamit sa seatbelt

CEBU, Philippines — Sugdan karong tuiga sa Land Transportation Office (LTO) ang agresibong kampaniya sa paggamit og seatbelt isip kabahin sa road safety measures.

Si Assistant Secretary Vigor Mendoza II nagkanayon nga iyang gimandoan ang tanang regional director ug district office heads nga gamiton ang social media ug ubang mass communication platforms aron dasigon ang mas daghang motorista nga sundon ang balaod sa mandatory nga paggamit sa seatbelt.

“Our approach on this matter will be two-pronged: the first is on strict enforcement through the deployment of our enforcers and coordination with other law enforcement agencies. The second one is a massive information drive to make the motorists realize the importance of wearing a seatbelt” matud ni Mendoza.

“This is also part of our Stop Road Crash program which we will be aggressively pushing this year”, padayag ni Mendoza.

Matud sa ahensiya nga ubos sa kampaniya sa pagpasiugda paggamit sa seatbelt makig-coordinate ang LTO sa mga lokal nga kagamhanan ug gamiton ang serbisyo sa mga citizen groups ug community organizations sa pagpahibawo ngadto sa publiko alang sa ilang siguridad. I-tap usab ang mga transport group, eskwelahan, ug uban pang mga stakeholder aron mapalapdan ang information ug communication drive sa pagtaas sa kahibalo kabahin sa kamahinungdanon sa paggamit sa seatbelt sa mga drayber ug pasahero.

Si Mendoza nagkanayon nga ang maong kampaniya magahatag usab og oportunidad alang sa pagpatuman sa mga research ug pagtuon uban ang mga motorista isip mga respondents, pagdumala sa lain-laing mga programa ug proyekto ug pagpalambo sa road safety advocacy network system.

Nunot niini, ang LTO magpahigayon og regular nga mga assessment sa ka-efficient ug kaepektibo sa kampaniya sa paggamit sa seatbelt. (BANAT NEWS)