Garcia nikwestiyon sa transmission sa annual budget ordinance

CEBU, Philippines — Gikwestiyon karon ni Cebu City Mayor Raymond Alvin Garcia kong aduna bay husto nga transmission ang pagpirma ni Bise Mayor Donaldo Hontiveros sa annual budget ordinance.

Kini human gipirmahan ni Hontiveros ang tinuig nga budget sa iyang kapasidad isip acting mayor sulod sa usa ka adlaw human kini gituki ug giaprobahan sa konseho.

Sa iyang bahin, si Hontiveros nagkanayon nga iyang gipirmahan ang ordinansa subay sa proseso ug giprayoridad kini nga gipatuman aron malikayan ang reenacted budget.

Samtang niadtong Biyernes sa hapon si Garcia nagkanayon nga ang impormasyon nga napirmahan na ang budget ordinance wala pa makaabot sa iyang buhatan.

Sa kataposang mga semana sa Disyembre 2024, nag-leave si Garcia hinungdan nga si Hontiveros ang nibarug isip acting mayor.

Matud ni Garcia nga mangutana siya kon aduna bay transmission gikan sa buhatan sa Sangguniang Panlungsod (SP) Secretariat ngadto sa buhatan sa mayor.

Giklaro ni Garcia nga ang usa ka mayor mahimong mopirma bisan unsang orasa apan gikwestiyon niya ang dili klaro nga petsa sa transmission.

"If it was transmitted on a Saturday, then it's highly irregular kay wa may tawo diri, close man ang SP, close sab ang office sa acting mayor", ni Garcia pa.

"So mangutana ko kong kanos-a ni na-transmit, sa ato pa niadtong Biyernes ila nga gi-print? Ug lapas sa alas 5:00, close na ang mga opisina", dugang ni Garcia.

Kaniadto, si Garcia nipadayag nga naimpluwensiyahan sa politika ang pag-aproba sa gihashasan nga P14.6 bilyones nga annual budget gikan sa iyang sugyot nga P17.9 bilyones.

Ang maong budget giaprobahan kini niadtong Biyernes, Disyembre 27, 2024.

Gikompirmar ni Hontiveros nga gipirmahan niya ang budget niadtong Sabado sa hapon human nila gi-review ug ang iyang abogado  niini kauban si Atty. Charisse Piramide, SP secretariat.

Kagahapon si Hontiveros nagkanayon nga bisan ang presidente sa Pilipinas nipirma sa 2025 budget niadtong Disyembre 30 nga holiday.

Iyang gipasabot nga walay polisiya nga nagdili sa bisan kinsang opisyal nga mopirma og dokumento sa adlaw nga walay trabaho.

Ug nagpakita lang kini nga ilang giuna ang pag-aproba sa budget aron malikayan ang reenacted budget.

“Kahibaw man tingali ta nga atong trabaho as public servant is 24/7”, padayag ni Hontiveros.

“And going back, wala mi nabakasyon gyud ato even on a holidays that’s the reason the council conducted a special session on a Friday”, butyag ni Hontiveros.

“With regards to the transmission, it is between my chief of staff and the SP na na siya kay mana man si Councilor Joy Young”, dugang ni Hontiveros. — /BDB (BANAT NEWS)