Imahen ni Santo Niño nibisita sa Cebu City Jail

CEBU, Philippines — Sagul-sagul ang gibating emosyon sa mga Persons Deprived of Liberty PDL sa Cebu City Jail Male Dormitory human sila gibisita sa imahen sa balaan nga bata Señor Santo Niño, kagahapon sa buntag Enero 5, 2025.

Pasado alas nuebe sa buntag niabot ang gisakyan sa balaan nga bata sa Cebu City Jail Male Dormitory diin gisugat kini sa mga official ug personnel sa maong pasilidad.

Gisugat usab kini og sayaw sa mga dancers nga PDL una kini gidala sa basketball court diin gipahimutang ang Sto. Niño.

Human ma plastar ang Santo Niño gisunod gilayon ang santos nga misa nga gitambongan sa bagang duot sa mga PDL diin ang uban nagbitbit sa ilang mga imahe sa balaan nga bata.

Atol sa pagpaambit sa pari sa iyang homily gipahimug-atan niini nga ang pagbisita sa balaan nga bata naghatag ug pasalig lakip ang paglaum nga ang mga PDL wala mag-inusara ug anaa ang Emmanuel nga nag-uban sa tanang panaw sa katawhan sa tagsa-tagsa ka kinabuhi.

Dugang pa sa maong pari nga ang Ginoo wala magkinahanglan sa bisan unsa nga mga gasa kung dili ang ato ra gayud nga pag-ampo ug motahan kita niya sa atong mga sala kay kanunay kini siyang nagpaabot sa atong pagtahan sa kaugalingon.

Usa ka PDL kinsa dugay nang panahon wala nay dalaw ang nihilak sa kalipay human ang balaan nga bata walay hunong sa pagbisita kanila aron sila makayukbo ug makahalad sa ilang mga pangaliya ug pag-ampo.

Dugang pa niini tungod kay wala naman siyay pamilya nga niduaw bugtong pag ampo nalang ang iyang gihimo nga hinagiban sa pagpakabuhi sulod sa maong facility.

Ang imahe sa balaan nga bata niestar lang kini sa maong facility sulod sa pipila ka oras ug gibalhin ra usab kini sa tambalanan. — /MEL (BANAT NEWS)