Bag-ong paagi pagkuha og business permit gipatuman sa Lapu-Lapu
CEBU, Philippines — Gihangop sa mga tag-iya ug nagdumala og mga establisamento ang gipatuman nga pamaagi sa kagamhanan sa siyudad sa Lapu-Lapu alang sa pag-renew sa ilang business permit ug real property tax.
Si Saturnino Matunag, empleyado sa usa ka establisamento sa siyudad sa Lapu-Lapu nga maoy gitahasan sa pagsumitir sa mga dokumento alang sa renewal sa ilang business permit miingon nga ang bag-ong pamaagi nakahatag kanila og kasayon ug nakuha-kuhaan ang nasinati nilang kahasol.
Si Kayle Cuizon nga support employee sa buhatan sa treasurers` office sa dakbayan miingon nga ubos sa New Queue Management System nagpadayon sila karon pagproseso sa gisumitir nga mga dokomento sa matag establisamento pinaagi sa paghatag og numero.
Ang hingtungdan nga nagsumitir sa mga dokumento ang makadawat og tex message gikan kanila alang sa pagproseso na niini.
Sa maong pamaagi kalikayan na ang pagdasok sa Hoops Dome sa Barangay Gun-ob sa maong dakbayan diin gipahigayon ang renewal sa business permit.
Sa nasayran ang renewal sa business permit hingpit nga gisugdan niadtong Huwebes Enero 2, 2024 ug hangtod lamang kini sa Enero 20, 2025.
Matud pa ni Cuizon nga sukad sa ilang pagbukas alang sa pagproseso sa mga documents hangtod niadtong Enero 4, 2024 ilang natala ang 1, 212 na ka taxpayers ang ilang naproseso. — /MEL (BANAT NEWS)
- Latest
