Wala mabayaring shabu maoy motibo sa pagpatay

CEBU, Philippines — Nailhan na sa kapolisan sa Lapu-Lapu City ang gikatahapan sa pagpamusil nga nahitabo sayo sa tungang gabii sa Bag-ong Tuig sa Barangay Poblacion sa maong siyudad nga usa ang namatay ug laing usa ang grabeng naangol.

Nasuta sab nga ang mamumuno nalambigit sa negosyo sa ilegal nga drugas ug daan ng nibahad sa mga biktima nga pamatyon kun dili nila mabayran ang P15,000 nga halin sa shabu nga gipabaligya kanila.

Si Police Captain Edcel Petecio sa LCPO nagkanayon nga ang naangol nga si Ronnie Cosep Tesero, 26, nga nagpuyo usab sa maong dapit miangkon sa may kalabotan sa ilegal nga drugas ang motibo sa mga mamumuno.

Matud pa ni Petecio nga diha sa sulod sa usa ka kuwarto ang duha nga nahimutang sa merkado publiko sa dihang gisulod kini sa mamumuno ug diretso silang gipamusil niini sa makadaghang.

Gikataho nga gitunong gyud sa mamumuno ang pag-atake sa duha atol sa pagbutobuto sa mga pabuto sa pagsugat sa Bag-ong Tuig.

Diha lang nahibaw-an nga dunay nahitabo krimen sa dihang nakapangayo og tabang si Tesero sa mga tawo diha sa merkado. Dali siyang gidala sa tambalanan apan ang iyang kauban nabugtoan gyud sa kinabuhi.   IBM BANAT NEWS