Cebu City mohingusog pa batok sa mga makililimos

CEBU, Philippines — Hingusgan pa sa sa Cebu City Anti-Mendicancy Board ang kampaniya batok sa pagpakilimos ug paghatag sa mga makililimos diin gitawag kini og “Stop Mendicancy”.

Niadtong Nobiyembre tuig 2024 gisugdan na sa CCAMO ang maong kampaniya pinaagi sa pagkahatag og kaalam sa kinabag-an ubos sa tabang sa Cebu City Transportation Office kinsa ang mga sakop sa CCTO nilibot ngadto sa mga pampubliko nga mga sakyanan nga dili na manghatag ngadto sa magpakilimos ilabi na og anaa sa pamapubliko nga lugar.

Tumong sa maong kampaniya aron nga moundang na ang mga makililimos sa pagpangayo.

Ang nagkadaiyang hugpong usab sa CCAMO nagbutang na og mga informational stickers sulod sa mga pampubliko nga mga sakyanan sa mga hotspot areas a siyudad sama sa duol sa mga dagkong mall nga mao ang Ayala Center Cebu ug SM City Cebu.

Ang maong paningkamot nagpahinumdom usab kini sa City Ordinance 1631 nga nagdili sa pagpakilimos ug paglimos diha sa kadalanan sa siyudad.

Gipahinumduman usab ang mga nanag-iya og mga pribadong sakyanan nga dili usab mohatag sa mga manuktok sa ilang mga sakyanan ilabi na og anaa kini sa stop light.

Ang mga makalapas makamulta kini og P1,000 o upat ka oras nga community service.

Ang pangu sa CCAMO Dr. Lucille Mercado nagkanayon nga kon buot man mohatag ngadto sa mga mendicant sa siyudad o sama sa pagpahigayon og feeding program mas labing maayo nga modapit sa legal nga mga hugpong o mo-coordinate sa ilang buhatan aron nga hapsay ug han-ay ang pagpahigayon niini. BDB BANAT NEWS