Kapin P1.5B nga drugas nasakmit sa PRO-7 sa usa ka tuig  

CEBU, Philippines — Sulod sa usa ka tuig gikan sa Enero 1 hangtud sa Disyembre 31, 2024 ang Police Regional Office(PRO)-7 nagpahigayon og 7,557 ka anti-illegal drug operations.

Ang maong operasyon niresulta sa pagkasikop sa 8,772 ka drug offenders ug pagsakmit sa 231,025.63 grams nga illegal nga drugas nga nagkantidad og kapin P1.5 billion.

Anaa sab sa 1,055 ampules sa nubain ang nasakmit nga nagkantidad og P121,325.

Sa ilang pakigbatok sa illegal gambling, ang kapolisan sa Rehiyon 7 nakadakop og 12,624 ka indibdiwal pinaagi sa 7,592 targeted operations ug anaa sa kapin P1.3 million nga kwarta ang nakompiskar. Mahitungod sa loose firearms, ang PRO-7 nakasikop sab og 1,013 ka tawo ug 4,127 ka armas ang na-recover, 148 ka explosives ingon man nagkalain-laing klase sa bala human nga nakapahigayon og 3,942 targeted operations.

Wala sab nilugak ang kapolisan sa Central Visayas sa pagpangita sa mga wanted persons diin 7,259 ka operations ang napahigayon nga miresulta sa pagdakop sa 905 ka most wanted ingon man 6,354 other wanted person nga dunay court-issued warrants.

Nakita usab nga dunay pagkunhod sa index crimes gikan sa 4,013 niadtong 2023 nahimo nalang kining 3,662 cases sa 2024, pasabot niini 8.75 percent ang pakunhod.

Matud ni PRO-7 Officer-In-Charge Police Brigadier General Roy Parena ang deployment sa PRO-7 personnel sa mga dapit nga dugukan og daghang tawo, pag-establisar og checkpoints, pagpalambo sa police visibility sa crowded areas ug wala'y hunong nga anti-criminality operations dako og natampo sa pagkunhod sa focus crimes.

Samtang miabot sa 10 ka durugista ang nisugat sa bag-ong tuig sulod sa prisohan sa Dakbayan sa Talisay.

Ang kapolisan sa Dakbayan sa Talisay pinangulohan ni Police Lt. Col. Epream Paguyod nihimo sa operasyon batok ilegal nga drugas sugod niadtong Disyembre 27 hangtud na sa petsa 31.

Sa gihimo nga operasyon, niabot sa 10 ka durugista ang nasikop nga gipaslak sa bilangguan.

Ang tanan nga shabu nga nasakmit nitimbang og 131.75 gramos diin ang kantidad gibana-bana nga moabot sa P895,900. (BANAT NEWS)