Nagtanum og ornamental plant sa bukirang barangay nagkadaghan

CEBU, Philippines — Padayon nga gihangop ang ornamental plant farming sa mga lumulupyo sa Dakbayan sa Sugbo sukad pa niadtong COVID-19 pandemic.

Ang CAD Ornamental Farming coordinator nga si Cherylyn Labitad nagkanayon atol sa pakighinabi ngadto sa Sugbuanon Channel nga paspas gyud ang pagsulbong sa maong industriya dinhi sa syudad diin ubay-ubay sa mga barangay ang nagpadayon sa maong matang sa pagpananum.

Si Labitad niingon nga adunay daghang batan-on sa Barangay Pamutan ang naninda na sab og mga ornamental ilabi na pinaagi sa ilang mga social media. Gani, ang maong barangay adunay pinakadaghan nga natala nga mga ornamental plant farmers sa siyudad kun diin niabot kini ngadto sa 172.

Ang Barangay Sapangdaku aduna say 101 ornamental plant farmers ug gisundan kini sa Barangay Busay nga adunay 63; Barangay Pung-ol Sibugay nga adunay 56; Barangay Budlaan nga adunay 50; Barangay Sirao adunay 49; Barangay Kalunasan nga adunay 42; Barangay Toong nga adunay 33; Barangay Buhisan nga adunay 22, Barangay Sudlon 2 nga adunay 13, ug Barangay Malubog nga adunay 11.

Ang nakanindot sa mga tanum nga ornamental aduna kini natural nga kaanyag ug kahumot diin makahatag sab kini og dugang kaanyag sa lugar kun asa kini haum nga iplastar. Ang mga ornamental nga tanom mahimo kini nga mga bulak, foliage plants, mga succulents, ug mga indoor plants.

Gawas sa mga nagpahigayon og online selling sa mga ornamental plants, aduna say satellite market ang mga farmers nga anaa nahimutang sa Plaza Sugbo. — /MEL (BANAT NEWS)