Cortes modangop sa korte suprema

CEBU, Philippines — Bisan pa nga gibasura sa Commission on Elections (Comelec) en banc ang motion for reconsideration, nagpabilin nga malaumon ang na-dismiss nga mayor sa dakbayan sa Mandaue Jonas Cortes ug nagplano nga mangayo og tabang sa Korte Suprema.

Si Cortes magpadayon sa pagdala sa isyu sa pinakataas nga korte sa Enero 2, 2025—ang unang working day sa tuig—isip iyang katapusang paningkamot aron mabali ang pagkansela sa iyang Certificate of Candidacy (COC) ug ang iyang diskwalipikasyon sa 2025 midterm elections.

Kini nagsunod sa desisyon sa Comelec en banc nga pagdumili sa apela ni Cortes niadtong Biyernes, Disyembre 27, nga nagpamatud sa unang desisyon sa Comelec Second Division sa pagkansela sa iyang COC tungod sa giingon nga material misrepresentation sa iyang dokumento.

Niadtong Biyernes sa gabii, pila ka oras human gipahibalo sa Comelec ang ilang desisyon, nagpagawas si Cortes og opisyal nga pahayag sa iyang social media page nga nag-awhag sa iyang mga supporters nga "magpadayon sa pagtuo."

"Sa akong mga loyal supporters, nasayud kita nga layu pa kaayo og abtan ang atong pakigbisog," ingon ni Cortes. Gingon niya nga ang desisyon sa Comelec nagpadasig pa kaniya sa pagpadayon sa pagpangayo og hustisya.

Si Cortes nag-ingon nga iyang buhaton ang tanan nga pamaagi ug ipadangat ang isyu sa Korte Suprema aron maseguro nga makab-ot ang hustisya ug madungog ang tingog sa katawhan nga nangandoy sa makatarunganon ug patas nga balaud.

"Akong ipasalig nga pabilin akong magpakatakus sa serbisyo aron panalipdan ang katungod sa katawhan ug sa Mandaue City," dugang pa ni Cortes.

Nagpasalamat usab ang mayor sa iyang mga supporters sa ilang walay hunong nga suporta nga naghatag kaniya og kadasig sa pagpadayon sa pakigbisog batok sa mga hagit ug “pagpanglutos” nga iyang gisagubang.

Giawhag niya ang iyang mga supporters nga magpabiling lig-on, maghiusa, ug magpadayon sa pagkuyog sa paghimo sa tanan nga pamaagi nga pinasubay sa insaktong balaud ug katarungan.

Gipasalig ni Cortes sa iyang mga supporters nga ang desisyon sa Comelec dili mao ang katapusan sa ilang pakigbisog alang sa hustisya, kondili ang sinugdanan sa ilang pakigbisog alang sa kamatuoran ug patas nga hustisya.

"Salamat sa inyong padayon nga pagbarug ug pagkoyog kanako. Together, we will overcome this challenge,"matud pa ni Cortes.

Sumala sa report, ang Comelec en banc nag-ingon nga “lack of merit” ang hinungdan nga ilang gibasura ang motion for reconsideration nga gi-file ni Cortes niadtong Lunes, Disyembre 23 nga naghangyo nga balihon ang unang desisyon sa Comelec Second Division nga pagkansela sa iyang Certificate of Candidacy tungod sa "material and false representation."

Ang ruling sa en banc, nga gipahibalo niadtong Biyernes, Disyembre 27, nagsustenir sa desisyon sa second division nga pagkansela sa COC ni Cortes tungod sa seryosong misrepresentation sa usa ka material nga impormasyon bahin sa iyang kwalipikasyon ug eligibility isip kandidato.

"We find no cogent reason to depart from the Assailed Resolution of the Commission (Second Division)," pagbasa sa usa ka bahin sa desisyon nga gisulat ni Comelec chairman George Erwin Garcia ug unom pa ka mga komisyonado—Marlon S. Cosquejo, Rey E. Bulay ug Nelson J. Celis, Ernesto Ferdinand P. Macedan Jr., Aimee P. Ferolino, ug Socorro B. Inting.

Si Mandaue City Administrator Atty. Jamaal James Calipayan daan ng miingon nga andam dawaton ni Cortes ang desisyon, mao nga nangandam na sila og sunod nga legal nga buhaton bisan pa sa wala pa magpagawas sa ruling.

Sumala ni Calipayan, makapangayo pa sila og temporary restraining order (TRO) ug uban pang legal nga solusyon.

Hangyo lang sa kampo ni Cortes nga dunggon dayon sa Korte Suprema ang ilang hangyo nga TRO o bisan unsang laing remedyo nga ilang ipangayo.

Kung mahinumduman, Comelec Second Division nagtugot sa petisyon sa pagkansela sa certificate of candidacy (COC) ni Cortes alang sa 2025 midterm elections.

Ang desisyon gipahibalo niadtong Miyerkules, Disyembre 18, 2024 ug gibase sa “material and false representation” sa COC ni Cortes.

Ang pagkansela sa iyang COC nagsugod sa petisyon nga gi-file ni Atty. Ervin Estandarte niadtong Oktubre 25, diin miingon nga si Cortes nakahimo og serious act of misrepresentation.

Ang Comelec Second Division midesisyon nga ang gibuhat ni Cortes usa ka misrepresentation sa iyang COC nga siya kwalipikado ug misrepresentar usab ang iyang eligibility alang sa posisyon nga iyang gustong daganan. (BANAT NEWS)