3 ka Oponganon nga mi top sa managlahing examination gipasidunggan

CEBU, Philippines — Giisip nga garbo sa mga Oponganon ang tulo ka mga molopyo sa Dakbayan sa Lapu-Lapu nga mi-top sa managlahing examination nga ilang giapilan.

Subay niini gidapit ni Lapu-Lapu City Mayor Junard Chan ang tulo sa pagbisita sa iyang buhatan ug iyang gipahalipayan sa paghatag og dungog sa mga Oponganon sa kalampusan nga ilang naangkon.

Ang mga topnotchers mao sila si Antoneth Acerde, teacher; Kyle Christian Tutor bar exam topnotcher ug Dana Athena Augusto, Radiologist.

Si Tutor nga molopyo sa Barangay Gun-ob sa maong siyudad ang nakadawat og certificate of appreciation ingon man monetary gift gikan ni Mayor Chan.

Sa nasayran nga si Tutor ang nakakuha og 85.77 percent passing rate ug maoy mga nag-una sa 3,962 nga mipasar sa bar examination gikan sa kinatibuk-ang gidaghanon nga 10,490 nga mikuha sa maong pasulit alang sa pagka abogado.

Ang laing duha ka Oponganon nga mi-top usab sa examination nga ilang giapilan ang nakadawat usab og certificate of appreciation ug cash gift gikan sa mayor. (BANAT NEWS)