De los Santos nangita sa work accomplishment sa CCMC

CEBU, Philippines — Samtang nagplano ang kagamhanan sa Dakbayan sa Sugbo nga i-bid out ang katukoran sa upat ka andana sa Cebu City Medical Center (CCMC), si Konsehal Mary Ann de los Santos, usa ka vocal critic sa mga kalangay sa CCMC ug isyu niini nagkanayon nga kinahanglang adunay technical assessment sa Commission on Audit (COA).

Niadtong Disyembre 18, 2024, si Cebu City Mayor Raymond Alvin Garcia nibutyag nga plano nilang sugdan ang bidding alang sa CCMC karong Disyembre 23, 2024 diin ang kataposang adlaw maatol sa Disyembre 27, 2024.

Si Garcia nagkanayon nga ilang i-bidding ang pagtukod sa 3rd, 4th, 5th, ug 6th floors sa CCMC nga ipaubos sa regular procurement process.

Apil niini ang pagpangayo og mga proposal sa mga bid nga adunay budget nga gigahin nga kapin sa P700 milyones.

Samtang si de los Santos nipadayag nga gusto niya nga mahuman na ang CCMC apan lakip sa iyang gipangita nga mga katin-awan mao ang work accomplishment.

 Subay sa privilege speech ni de los Santos sa mga kalangay ug ubang isyu sa CCMC sunod-sunod nga executive sessions ang gipahigayon.

Lakip sa mga isyu nga iyang gipadayag mao ang giingong wala mabayri nga bayranan ngadto sa contractor nga mao ang C.E. Padilla diin wala pa kini masulbad.

Gikataho nga sa pagtukod sa CCMC, si Engineer Lowell Corminal, pangulo sa Department of Engineering and Public Works (DEPW) nagkanayon nga nahuman na ang phase 1 samtang ang phase 2 natapos na pinaagi sa kontrata sa C.E. Padilla. Base usab sa report niadtong Oktubre 30, 2024 gipadayag nga adunay suwat gikan sa DEPW nga pinetsahan og Agosto 9, 2024 nga nagtumbok nga ang phase 1 gi-award ngadto sa C. E. Padilla Construction.

Gipadayag usab nga ang pagtukod sa interior masonry works ug mechanical, electrical, plumbing, ug fire systems alang sa ika-5 ug 6 nga andana nalakip sa phase 1 ang gihatag sa CHARLZ Construction.

Ang katukoran sa CCMC phase 2 gitakdang ihatag ngadto sa C. E. Padilla Construction Inc., samtang ang Phase 3 nga naglakip sa pagkompleto sa CCMC gikan sa lower, ground ug upper floor ngadto sa ikaduhang andana gihatag ngadto sa C. B. Garay Philwide Builders.

Gipakita sab nga ang CCMC phase 4 gihatag ngadto sa M. E. Sicat Construction Inc./AVECS Corporation.

Si De los Santos nipadayag og kabalaka kabahin sa M. E. Sicat Construction, kansang award gi-terminate ubos sa "gentlemen's agreement. Dugang ni de los Santos nga sanglit napulo na ka tuig ang nilabay ug wala pa mahuman ang CCMC diin nikabat na sa P1 bilyon ang nagasto, panahon na nga ang COA mo intervene. — /BDB (BANAT NEWS)