Taga Bohol nakuhaan og P13M shabu

CEBU, Philippines — Nadakpan sa mga operatiba sa Consolacion Municipal Police Station ang usa ka high value individual sa gipahigayong buy-bust operation sa District 2, Barangay Pulpogan, Lungsod sa Consolacion kagahapon sa alas 3 sa hapon.

Ang nadakpan mao si Jame Estenzo Lacang, 46, lumad nga taga Probinsiya sa Bohol apan kasamtangan nga nagpuyo sa maong barangay ug usa kini ka high value individual.

Nasakmit sa mga operatiba ang duha ka kilong gidudahang shabu nga nagkantidad og P13.6 million. Nagkanayon si Police Lieutenant Colonel Eunil Avergonzado, Hepe sa Consolacion Police Station nga ang suspetsado pundohanan ug tighatod og illegal nga drugas.

Matod pa ang amo sa dinakpan kay naa sa Abuyog, Leyte ug maoy nagkontrol niini.  Nasayran nga nadakpan na kaniadto ang suspetsado didto sa Bohol gumikan gihapon sa kalambigitan sa illegal nga drugas. (BANAT NEWS)