Mga kawani sa City Hall hatagan og insurance
CEBU, Philippines — Mga kawani sa Dakbayan sa Sugbo nga adunay field work o may mga trabaho gawas sa ilang tagsa-tagsa ka mga buhatan pahatagan og insurance ni Mayor Raymond Alvin Garcia.
Base sa taho sa Cebu City Public Information Office nga unang makapahimulos sa maong insurance ang mga kawani sa Cebu City Disaster Risk Reduction and Management Office (CCDRRMO) tungod kay una kining nakakompleto sa pagduso sa listahan sa mga empleyado.
Mo epekto na ang insurance alang sa mga taga-CCDRRMO karong Enero 2025.
Nasayran nga nalatid sa insurance nga makadawat og P100,000 ang pamilya sa mga empleyado kinsa naaksidente samtang nagtrabaho gawas sa opisina ug ulian usab kini og P20,000 nga nagasto sa tambalanan kon ma ospital.
Matud ni Garcia nga padayon ang iyang pakignegosasyon sa usa ka laboratory company aron makapahimulos og discount ang tanang mga empleyado sa city hall sa ilang mga laboratory test.
Gawas sa mga kawani nga magtrabaho sa gawas sa ilang mga buhatan ang mga habal-habal driver ug mga delivery driver makapahimulos usab sa samang insurance. (BANAT NEWS)
- Latest
