CEBU, Philippines — Walay tugotan sa pag-leave o pagbakasyon sa mga traffic enforcer sa Traffic Enforcement Agency of Mandaue (TEAM) niining panahon sa pasko.
Kini ang gipadayag ni Hylle Retuya, pangulo sa TEAM kinsa nagkanayon nga tungod sa namatikdan nilang pagdasok sa mga sakyanan sa kadalanan dugang usab nga mga enforcer ang ilang gikinahanglan nga tahasan sa kahapsay sa dagan sa mga sakyanan.
Matud ni Retuya nga nakiglambigit karon sila sa Mandaue City Police Office (MCPO) ug nagpatabang usab sila sa mga force multiplier sa pagdumala sa kahapsay sa dagan sa mga sakyanan sa kadalanan.
Gibutyag ni Retuya nga nakig-alayon na usab sila sa buhatan sa Traffic Enforcement Unit (TEU) sa MCPO apil niini ang mga barangay tanod sa kabarangayan.
Giila ni Retuya ang mga dalan nga kasagaran makasinati og kahuot sa mga sakyanan ilabi na sa buntag ug panahon sa gabii.
Naglakip niini mao ang eskina Sudlon sa Barangay Maguikay, gikan sa M.C. Briones nga magsugod sa alas 6:00 hangtud na sa alas 8:00 sa buntag gawas lang sa weekends ug holidays. (BANAT NEWS)