Kapolisan sa Talisay nag-monitor batok sa lantaka ug boga
CEBU, Philippines — Padayon ang pag-monitor sa kapolisan sa Dakbayan sa Talisay kalabot sa paggamit og lantaka ug boga.
Si Police Lieutenant Colonel Epream Paguyod, hepe sa kapolisan sa Dakbayan sa Talisay nagkanayon nga gidili ang maong klase sa pabuto ug kompiskahon gyud nila kini.
Niadtong tuig 2009 usa ka 6-anyos nga batang lalaki ang namatay human kini naunay sa lantaka ug dili buot ang kapolisan sa siyudad nga masubli ang maong hitabo.
Gawas sa lantaka o boga ilaha usab nga kompiskahon ang mga pabuto nga ipamaligya.
Ang Talisay wala pay giluwatan nga kamandoan nga adunay firecracker zone.
Nanghinaot si Paguyod nga mosunod sa mga lagda ang mga Talisaynon aron ang ilang ipuhonan sa pagbaligya og pabuto magamit nila sa uban nga gastohan. (BANAT NEWS)
- Latest
