Dalan J. Alcantara gikatakdang palapdan

CEBU, Philippines — Gikatakdang palapdan ang dalan J. Alcantara sa Barangay Sambag I pinaagi sa pagpahiuli sa usa ka lane sa maong dalan aron masulbad ang kahuot sa dagan sa trapiko diha sa lugar  human sa Sinulog.

Ang J. Acantara Street mao ang karsada sugod sa eskina sa mga dalan sa P. Del Rosario ug Leon Kilat lahos sa V. Rama Avenue.

Gibana-bana nga moabot og 4.2 metros ang gilapdon sa bahin nga ipahiuli nga maglakip sa 1.2 metros nga gilapdon sa aseras ug 2.5 metros sa karsada ug tunga sa metros alang sa curve ug gutter.

Base sa report sa Cebu City Public Information Office niuyon ang konseho sa maong road recovery project atol sa ikaduha ug kataposang public hearing nga gitambongan sa chairman sa committee on infrastructure and urban planning sa konseho sa siyudad nga si Konsehal Jerry Guardo lakip ang Cebu City Assessor Liezl Calamba, Engineer Norman del Mar ug mga kauban sa Department of Engineering and Public Works, mga representante sa Division for the Welfare of the Urban Poor, ug ang Prevention Restoration Order Beautification Enhancement team.

Matud ni Guardo nga tumong sa pagbalik sa usa ka lane sa maong dalan mao ang pagtubag sa suliran sa grabeng kahuot sa dalan ilabi na kong tinggawas sa mga tinun-an.

Anaa nahimutang sa Barangay Sambag I ang University of San Carlos South Campus ug FBC Christian School, Inc., samtang anaa ra usab sa silingang barangay sa Sambag II ang Southwestern University PHINMA ug ang Southwestern University Medical Center. (BANAT NEWS)