Solar power farm tukoron sa lungsod sa Sogod
CEBU, Philippines — Usa ka kompaniya gikan sa nasud sa South Korea ang nagplano nga magtukod og 100--megawatt solar power farm sa lungsod sa Sogod, amihanang bahin sa lalawigan sa Sugbo.
Subay niini, usa ka kasabotan o memorandum of understanding (MOU) ang gipirmahan sa SelTech Co. Ltd ug sa lokal nga kagamhanan sa lungsod sa Sogod, alang sa hiniusang pagpangita og project site, pagkumpleto sa “institutional procedures” ug “logistical support” alang sa maong multi-billion investment o proyekto.
Ang managing director sa maong kompaniya nga si Bong Ho Cho ug Sogod Mayor Lissa Marie “Moonyeen” Durano-Streegan ang mipirma sa maong MOU niadtong Nobiyembre 29. Ubos sa maong MOU, usa technical working group (TWG) ang umulon alang sa maong proyekto.
“.. the parties shall create ang Technical Working Group to plan and establish relevant trainings, testing and evaluating cooperative activities, and conduct other relevant activities jointly decided” tipik sa maong MOU.
Ang SelTEch naggahin og 100 million dollar o P5.7 billion alang sa pagtukod sa maong 100-megawatt “agrivoltaics” solar farm sa lungsod sa Sogod.
Ang SelTEch usa ka kompaniya, nakabase sa Chengju City, duha ka oras nga byahe pinaagi sa train gikan sa capital sa South Korea, ang Seoul.
Ang maong kompaniya adunay operasyon sa nagkadaiyang solar power plants dili lang sa South Korea apil napud sa Sri Lanka, United Arab Emirates, Kenya ug Tanzania. (BANAT NEWS)
- Latest
